सचित्र बाल कथामा आरोही पासाङ ल्हामु, पर्यटन उद्यमी अम्बिकासहित चार अग्रणी महिलाको जीवनी

काठमाडौं । राष्ट्रिय जीवनमा महत्वपूर्ण भूमिका निर्वाह गरेका अग्रणी चार महिलाको जीवनी सचित्र बाल कथाका रुपमा सार्वजनिक गरिएको छ । पर्यटन उद्यमी अम्बिका श्रेष्ठको निधन भएको ४५ दिनको अवसर पारेर उक्त चार पुस्तक आइतबार लोकार्पण गरिएको हो ।

संग्रहभित्र श्रेष्ठसँगै न्यायकर्मी सपना प्रधान मल्ल, प्रथम नेपाली महिला सगरमाथा आरोही पासाङ ल्हामु शेर्पा र बौद्ध भिक्षु गायिका आनी छोइङ डोल्माका जीवन भोगाइ समेटिएका छन् । लुज माथेमाका शब्दहरूमा उभिएको यो संग्रह पब्लिकेशन नेपालयले तयार पारेको हो ।

पुस्तकको विमोचन बत्तीसपुतलीस्थित द्वारिकाज होटलमा गरिएको थियो । राजा वीरेन्द्रको राज्याभिषेकका बेला संसारभरिबाट आएका पाहुनाहरूका निम्ति होटल अभाव भइरहेको बखत आफ्नै घरलाई अतिथि गृहका रूपमा थालनी गरिएको पहल नै कालान्तरमा होटल द्वारिकाजमा परिणत भएको हो ।

अम्बिकाको मेहनतकै प्रतिफलमा यो होटल विशिष्ट विदेशी पाहुनाहरूको रोजाइमा पर्ने गरेको छ ।

भिक्षु गायिका आनी सांगीतिक कर्ममार्फत परोपकारका क्षेत्रमा सक्रिय छिन् । शिक्षा र स्वास्थ्यका क्षेत्रमा उनको उल्लेखनीय योगदान छ ।

सगरमाथाको शिखर चुम्ने क्षणसम्म पुग्नुअघि दिवंगत आरोही पासाङ ल्हामु शेर्पाले नेपाली समाजमा परम्परादेखि चल्दै आएको विभेदकारी परिस्थितिविरुद्ध निकै संघर्ष गर्नुपरेको थियो ।

कानूनी क्षेत्रमा अग्रता लिइरहेकी सपना प्रधान मल्लले भने विभेदमुक्त समतामूलक समाज स्थापनाका लागि निकै अघिदेखि आफूलाई सक्रिय बनाउँदै आएकी छन् ।

पुस्तक चारै जना पात्र तथा तिनका प्रतिनिधिले लोकार्पण गरेका थिए । दिवंगत अम्बिका र पासाङ ल्हामुका तर्फबाट उनीहरूका सुपुत्रीहरू क्रमशः संगीता एवं दावाको प्रतिनिधित्व थियो ।

होटल व्यवसायी अम्बिकाकी छोरी संगीताले छोरीहरू सबै मामिलामा सक्षम र पूर्ण रहन्छन् भन्ने ज्ञान आफ्नी आमाबाट विरासतका रूपमा पाएको बताइन् ।

सर्वोच्च अदालतकी न्यायाधीश सपना प्रधान मल्लले भने केटाकेटीलाई हुर्काउँदाको क्षणदेखि नै अभिभावकले तिनको हक र अधिकारको चेतना प्रदान गर्नुपर्ने औंल्याइन् ।

आनी छोइङले आम केटाकेटीभन्दा आफ्नो बाल्यकाल बेग्लै किसिमको कठोर रहेको जानकारी दिँदै त्यो बेग्लैपनाले नै आफूलाई आजको ठाउँसम्म पुर्‍याएको औंल्याइन् ।

पासाङ ल्हामुकी सुपुत्री दावाले भने आफ्नी आमाले सफलता अघि पनि चार पटक सगरमाथा चढ्ने प्रयास गरेको जानकारी आम रूपमा बाहिर नआएको अवस्थामा यो पुस्तकले ससाना बालबालिकालाई तथ्यसँग नजिक्याउने अपेक्षा प्रकट गरिन् ।

लन्डन स्कुल अफ इकोनोमिक्सबाट अन्तर्राष्ट्रिय सम्बन्ध तथा लैङ्गिक विकास अध्ययन गरेकी लेखिका लुज माथेमाले आफूले ‘अदम्य महिलाहरू’ शीर्षकमा शृंखलाबद्ध कथात्मक बाल जीवनी लेखन थालेको बताइन् । त्यसैको पहिलो चरणमा चार नेपाली अग्रणी महिलाहरूको यो संग्रह तयार भएको उनले जानकारी दिइन् ।

‘हामी केटाकेटी हुँदा हजुरबुवाले आफ्ना अनुभवहरू अनि ठूला मानिसहरूको जीवनबारे कथा सुने जस्तै गरी चाखलाग्दो ढंगमा भन्नुहुन्थ्यो’, लेखिका लुज भन्छिन्, ‘उहाँबाटै मिलेको प्रेरणाबाट मैले नेपाली महिलाहरूको गाथा लेख्ने क्रम थालेकी हुँ ।’

अदम्य नेपाली महिलाका यी छोटा अनि सरल कथाहरूमा प्रकाश रञ्जित, शैली मल्ल, न्हुज शाक्यले चित्रहरू तयार पारेका छन् । प्रवीण अधिकारीले ती कथाहरूको नेपाली अनुवाद गरेका हुन् । एकै पुस्तकमा अंग्रेजी र नेपाली दुवै भाषा पढ्न सकिन्छ ।

‘नेपाली महिलाहरूका संघर्ष र सफलताका कथाहरू कमै भनिएका पाइन्छन्’, पब्लिकेशन नेपालयकी प्रमुख कार्यकारी सैजन मास्के भन्छिन्, ‘यसरी शृंखलाबद्ध रूपले बाल कथाका रूपमा जीवनी प्रकाशन गर्दा भावी पुस्ताले समेत उनीहरूबाट प्रेरणा लिन सकून् भन्ने उद्देश्यका साथ हामीले यसको सुरुवात गरेका हौं ।’