अमेरिकाको मेरिल्यान्डमा नेपथ्य संगीत यात्रा: नयाँ पुस्तालाई मातृ भाषा सिकाउन अमृत याचना

मेरिल्यान्ड । आइतबार बेलुकी ‘दी हल एट लाइभ’को भुईंतलामात्र होइन, माथिल्ला कक्ष पनि दर्शकले भरिएका थिए । त्यो भीडमै रमाइरहेकामाझ एक अमेरिकी थिइन्, फलेसिया डनल्याप ।

‘यस हलमा आजसम्मकै उत्कृष्टमध्येको शो अनुभव गरें’, त्यस हलका मनोरञ्जन तथा प्रोडक्सन महाप्रबन्धक फलेसिया भनिरहेकी थिइन्, ‘प्रोडक्सन र पफर्मेन्सका हिसाबले चुस्त, गजबको प्रस्तुति !’

दर्शकमा उत्पन्न ऊर्जाकै आधारबाट पनि यसको विशिष्टता स्पष्टै झल्किएको उनको प्रतिक्रिया थियो । ‘म ड्युटीमै भए पनि दर्शकका रूपमा समेत रमाइरहें’, कार्यक्रममा आफ्नो मोबाइलमा कैद गरेका भिडियोहरू देखाउँदै उनले भनिन् ।

निर्धारित समयमा कार्यक्रम सुरु भएसँगै नीलो जिन्स लगाएका अमृत गुरुङ देखापरे र दर्शकतर्फ झुकेर अभिवादन गरे । ड्रमसेटको ‘छ्याङ्ङ’ आवाजसँगै दुवै हात दर्शकतर्फ झट्कारे । यतिञ्जेल हलमा भरिएका दर्शकमाझ व्यापक उत्साह र हलचल सुरु भइसकेको थियो । त्यही उत्साहलाई समात्दै उनले पहिलो गीत सुनाए-

‘कोशीको पानी यो जिन्दगानी
सललल जाइजाने हौ हजुर
आमाको कोखमा बास मात्र लिएँ नि
कुन देशको मरन हौ हजुर’

त्यसपछि ब्यान्डका सार्वकालिक हिट गीतहरू ‘भेंडाको ऊन’ र ‘छेक्यो छेक्यो’ गाएपछि अमृतले दर्शकसँग भलाकुसारीको क्रम सुरु गरे ।

कार्यक्रममा नयाँ-पुराना गीतको लस्कर थियो । ती सबैको बीचबीचमा अमृतले दर्शकसँग दोहोरो संवाद पनि जारी राखेका थिए ।

सबै स्थानमा जस्तै यहाँ पनि अमृतले भावी पुस्तालाई सकेसम्म मातृ भाषा सिकाउन र त्यो सकिएन भने कम्तीमा नेपाली भाषा सिकाएर भए पनि तिनलाई उनीहरूको जरोसँग जोडिदिन अनुरोध गरेका थिए ।

कन्सर्ट हेर्न आएका थुप्रै दर्शकले साथमा राष्ट्रिय झण्डा पनि बोकेरै ल्याएका थिए । ढाकाटोपी अनि भादगाउँले टोपी लगाएर उपस्थित भएका पनि जताततै देखिन्थे । दर्शक अनेक किसिमका समूहमा आएका थिए । कोही साथीसँग मिलेर आएका थिए, कोही आफ्ना जोडीका साथमा । कोही अभिभावक र केटाकेटीसहित सपरिवार आएका उत्तिकै भेटिन्थे ।

त्यस्तै समूहमध्ये एक थियो भर्जिनियामा केटाकेटीलाई नेपाली भाषा, संस्कृति र सम्पदा पढाउन ‘पाठशाला’ सञ्चालन गरिरहेका स्वयंसेवी शिक्षकको जमात । वन्दना, सम्झना, सजना, राज र राजेशलगायतको त्यो समूह सुरुदेखि रमाइरहेको देखिन्थ्यो ।

‘नेपाली बालबालिकाले आफ्नो भाषा र संस्कृति सिकून् भन्ने अमृत दाइको चाहनासँग हाम्रो मिसन ठ्याक्कै मिलेको पायौं’, उनीहरूले भने, ‘हाम्रो उद्देश्य पनि आफ्नो जरालाई जोगाउने र भविष्यलाई उज्ज्वल बनाउने नै हो ।’

नेपथ्यको कन्सर्टबाट आफूहरू उत्तिकै रमाएको उनीहरुको प्रतिक्रिया थियो ।

‘यसअघि थुप्रै नेपाली कन्सर्ट हेरेको भए पनि कार्यक्रमको गुणस्तर र समयको इज्जत गर्ने मामिलामा नेपथ्य सबैभन्दा माथि पायौं’, उनीहरूले थपे, ‘यसका लागि ब्यान्ड र आयोजकलाई धन्यवाद छ ।’

कन्सर्टमा मुख्य गायक अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।

शृंखलाबद्ध अमेरिका यात्रामा अघिल्ला ६ वटै कन्सर्ट भव्य रूपमा सम्पन्न भएपछि अब सातौं तथा अन्तिम प्रस्तुतिका लागि नेपथ्य पेन्सिलभानियाको ह्यारिसबर्गतर्फ लाग्ने ब्याण्ड व्यवस्थापक नेपालयका अर्पण शर्माले जानकारी दिए । उनका अनुसार ब्यान्ड यो शहर पनि पहिलो पटक पुग्ने भएको हो । ह्यारिसबर्गको ‘दी फोरम अडिटोरियम’मा सेप्टेम्बर ७ तारिख शनिबारका दिन नेपथ्यको कन्सर्ट हुने शर्माले बताए ।

तस्विरहरु : दिपित राज/नेपालय