बङ्गलादेशमा राष्ट्रगान परिवर्तन गर्न माग

काठमाडौं । बङ्गलादेशमा राष्ट्रगान परिवर्तन गर्न माग भएको छ । बङ्गलादेशका पूर्व ब्रीगेडियर जनरल तथा बङ्गलादेशको इस्लामिक दल जमात इ इस्लामीका आमिर गुलाम आजमका छोरा अमान आजमीले यस्तो माग गरेका हुन् ।

विगत आठ वर्षसम्म जबर्दस्त बेपत्ता बनाइएका र केही समय अगाडि मात्र सार्वजनिक भएका उनले यस्तो माग गरेका हुन् । भारतीय साहित्यकार रवीन्द्रनाथ ठाकुरले लेखेको ‘आमार सोनार बाङ्ला’ नामक गीतलाई सन् १९७१ मा बङ्गलादेश स्वतन्त्र भएपछि राष्ट्रगानको रुपमा राखिएको थियो ।

अहिले राष्ट्रगान परिवर्तनको कुरा गर्ने अमान आजमीले वर्तमान राष्ट्रगानले स्वतन्त्रताको ऊर्जा नबोक्ने दाबी गरेका छन् । बङ्गलादेश पूर्वी पाकिस्तानबाट स्वतन्त्र देश बन्नमा भारतले कूटनीतिक, आर्थिक र सैन्य साथ दिएको थियो । हसिनापछिको सरकार र भारतको तालमेल राम्रो मिलेको नदेखिएको दुवै देशका जानकार हरुले भन्दै आएका छन् ।