उपसभामुख हटाउने तयारीमा गठबन्धन- के छ आरोप ?

काठमाडौं । सत्ता गठबन्धनले उपसभामुख रानालाई हटाउन प्रस्ताव लैजाने भएको छ ।

हिजो बसेको सत्ता गठबन्धनको बैठकमा प्रधानमन्त्री केपी शर्मा ओलीले उपसभामुखको आचरण सही नभएको भन्दै प्रस्ताव लैजानुपर्ने बताएका छन् ।

बैठकमा सहभागी एक नेताले भने, ‘प्रधानमन्त्रीले हिजोको बैठकमा उपसभामुखको आचारणमा प्रश्न उठाउँदै महाभियोगको प्रस्ताव गर्नुभएको थियो । हिजोको बैठकमा भोलिसम्ममा टुंग्याउने भन्ने भएको थियो । उहाँहरूले आजै दर्ता गर्नपनि सक्नुहुन्छ ।’

दुई ठूला दलले दर्ता गरे साना दलहरुको समर्थन रहने हिजोको बैठकमा नेताहरूले बताएको ती नेताले सुनाए ।

उपसभामुख इन्दिरा रानाले आफ्नो पदीय मर्यादा बिर्सेर अमेरिकी दूतावासलाई लेखेको एउटा पत्र सार्वजनिक भएको छ । पत्रमा उनले आफूसहित पाँचजनालाई भिसाको अन्तर्वार्ताका लागि समय उपलब्ध गराउन आग्रह गरेकी छन् ।