अमेरिकी प्रहरीले भन्यो- ममता काफ्लेको केसमा नयाँ ‘क्लु’ पायौं, एक व्यक्ति सम्पर्कमा

काठमाडौं । अमेरिकामा बेपत्ता भएकी नेपाली चेली ममता काफ्लेको अनुसन्धान प्रगतिबारे अमेरिकी प्रहरीले सार्वजनिकरुपमा जानकारी गराएको छ । सिटी अफ मनासस पार्क पुलिस डिपार्टमेन्टले एक प्रेस विज्ञप्ति जारी गर्दै नेपाली समूदायलाई पछिल्लो अपडेट दिएको हो ।

विज्ञप्तिमा ममता काफ्लेको अनुसन्धानमा प्रहरीले विभिन्न सूचना र प्रमाणहरु प्राप्त गरिरहेको उल्लेख छ । साथै, घटनाको विषयमा सूचना भएका एकजना व्यक्ति प्रहरीको सम्पर्कमा आएको पनि जनाइएको छ ।

विज्ञप्तिमा भनिएको छ, ‘हालै एकजना व्यक्ति सूचना सहित आएका छन्, जुन यो केसमा सहयोगी हुन सक्छ ।’

प्रहरीले ती व्यक्तिको नाम भने गोप्य राखेको छ । विज्ञप्तिमा जुलाइ २८ देखि अगष्ट ५ भित्र नरेश भट्टसँग भेटघाट वा कुराकानी भएका व्यक्तिहरुलाई सम्पर्कमा आउन आह्वानसमेत गरिएको छ । जुलाइ २८ बाट ममता बेपत्ता भएकी थिइन् भने अगष्ट ५ मा नरेशले श्रीमती हराएको उजुरी दर्ता गरेका थिए ।

‘हामी अहिलेसम्म अनुसन्धानकर्ताहरुले नभेटेका वा बयान नलिएका व्यक्तिहरु खोजिरहेका छौं’, विज्ञप्तिमा भनिएको छ ।

मनाससका प्रहरी प्रमुख मारियो लुगोले एक व्यक्ति नाम नखोल्ने शर्तमा आफूहरुको सम्पर्कमा आएको र केही सूचना दिएको बताएका छन् ।

उनले डब्लुयूएसए ९ च्यानलसित कुरा गर्दै भने, ‘उनले दिएका सूचनाहरुमा हामी काम गरिरहेका छौं । घटनासँग सम्वन्धित हुन् कि होइनन् भनेर हेरिरहेका छौं ।’

प्रहरीले ममताको घर परीसरमा खोजतलास जारी राखेको छ । पछिल्लो पटक बुधबार गरिएको खोजतलासमा केही पनि नयाँ प्रमाण नभेटिएको लुगोले बताए । तर, अघिल्ला खोजतलासहरुमा घटनासँग सम्वन्धित हुनसक्ने केही प्रमाणहरु फेला परेको उनको भनाइ छ । ती प्रमाणहरुको फरेन्सिक परिक्षण भइरहेको उनले जानकारी दिए ।

नेपाली समूदायलाई सम्वोधन गर्दै लुगोले भने, ‘हामी अहिले पनि ममताको खोजी गरिरहेका छौं । सानो–सानो कुराहरुलाई एक ठाउँमा राखेर ममतालाई न्याय दिनुपर्ने छ ।’

प्रहरीले ममताका श्रीमान नरेशविरुद्ध लाश वेपत्ता पारेको मुद्दा मात्र दायर गरेको छ । त्यसको अर्को एउटा मोसन हियरिङ आज हुँदैछ । आज पनि नरेशकै वकिलका मागअनुसार मोसन राखिएको हो । उनीहरुले ममता कार्यालयबाट निस्किएको र कालो कारभित्र चढेको सीसीटीभी फुटेज तथा उनको फोनभित्रका डाटाहरुको सूचना आफूहरुलाई पनि शेयर गर्नुपर्ने माग राखेका छन् । यही विषयमा आजको सुनवाइमा न्यायाधीशले निर्णय दिनेछन् ।

फक्स ५ वासिंटन डिसी च्यानलले अदालतको डकुमेन्टलाई उध्दृत गर्दै नरेशले आफ्नो आम्दानी शून्य देखाएको जनाएको छ । जबकी उनी कामकाजी व्यक्ति हुन् ।

प्रहरी नरेशलाई फेलोनी १ अन्तर्गत हत्याको मुद्दा दायर गर्ने प्रयासमा छ, तर प्रमाण पुगेको छैन । अहिले दायर भएको मुद्दा फेलोनी ६ अन्तर्गत लाश लुकाएको सम्बन्धी हो । आउँदो १६ तारिखबाट ५ महिनाभित्र यो अभियोग प्रमाणित भएन भने नरेशले सफाइ पाउन सक्छन् । तर, त्योभन्दा अगाडि नै प्रहरीले हत्याको मुद्दा दायर गरिने सम्भावना छ ।