हिमालय रोडिजको छैठौं सिजन असोज १४ गतेबाट प्रसारण हुँदै

काठमाडौं । नेपालको एकमात्र साहसिक रियालिटी शो ‘हिमालय रोडिज’को छैठौं सिजन आगामी असोज १४ गतेदेखि हरेक सोमबार राति ९ बजे हिमालय टीभी एचडीबाट प्रसारण हुने भएको छ ।

‘वेलकम टु द जंगल’को थिममा निर्माण भएको यसपटकको रोडिजमा कुल चार जना ग्याङ लिडर हुनेछन् जसले आफ्नो टीमलाई जिताउन आफ्नो सम्पूर्ण शक्ति लगाउनेछन् । कार्यक्रममा होस्टका रुपमा रेमनदास श्रेष्ठ फर्किएका छन् । रेमन सिजन एकदेखि चारसम्म होस्टका रुपमा थिए ।

पहिलो सिजनदेखि नै ग्याङ लिडरका रुपमा रहेका आशिष राना लाहुरे र दिया मास्के एवं सिजन ३ देखि निरन्तर रहेका अनुपविक्रम शाही र गत सिजनदेखि अनुबन्धित प्रियंका कार्की यो सिजनमा ग्याङ लिडरका रुपमा देखिनेछन् । योपटक चार जना ग्याङ लिडरको टीमवीच रोचक प्रतिस्पर्धा गराइएको कार्यक्रमका निर्देशक शिमोस सुनुवार बताउँछन् ।

जंगल थिममा कार्यक्रम निर्माण भएको हुँदा जर्नी राउण्डका सवैजसो एपिसोड जंगल सर्भाइभलमा आधारित रहेको र अघिल्ला सिजनभन्दा निकै रोमाञ्चक बनेको निर्देशक सुनुवारले बताए । पाँच हजारभन्दा धेरै आबेदकबाट छानिएका उत्कृष्ट प्रतिभाहरुलाई छानेर अडिसनमा सहभागी बनाइएको छ । एमटीभी इन्डियाको फम्र्याटमा आधारित भएर २०७५ सालदेखि नेपालमा प्रसारण सुरु भएको हिमालय रोडिज सिजन ६ सम्मको यात्रा गर्ने पहिलो फ्रेन्चाइज रियालिटी शो हो ।

‘युवापुस्तावीच अत्यन्तै लोकप्रिय टीभी कार्यक्रमका रुपमा रोडिजले आफुलाई स्थापित गरिसकेको छ’ हिमालय टेलिभिजनका कार्यकारी निर्देशक श्याम कडेलले भने– हामीले हरेक सिजनलाई थप गुणस्तरीय र रोचक बनाउन कोसिस गरिरहेका छौं ।’

हिमालय रोडिजलाई विगत पाँच सिजनदेखि टाइटल स्पोन्सरका रुपमा यामाहा मोटरसाइकलले साथ दिँदै आएको छ, जसका कारण यामाहा र रोडिज पर्यायवाचीजस्तै भएका छन् । यसैगरी पावर बाई रेडबुल र स्पोन्सर बाई डार्क फेन्टासी, कोस्पन्सरमा शाओमी मोबाइल र इमामी फेयर एण्ड हेन्डसम, एसोसिएट स्पोन्सरका रुपमा केएफसी, यति कार्पेट, अर्विट एमबीबीएस, रोहोतो सेलसन, र मेडिकल पार्टनर स्टार हस्पिटल रहेका छन् ।

कार्यक्रमको बजार ब्यबस्थापन पार्टनर मिडिया सेन्स रहेको छ ।शुक्रबार काठमाण्डौमा आयोजित कार्यक्रममा टाइटल स्पोन्सरसहितका प्रायोजकसँग सम्झौता गरिएको छ भने कार्यक्रममा अनुवन्धित ग्याङ लिडर र होस्टलाई समेत सार्वजनिक गरिएको छ ।