अकोराबको अध्यक्षमा गिरी, वरिष्ठ उपाध्यक्षमा देवकोटा र महासचिवमा दनुवार निर्विरोध चयन

काठमाडौं । सामुदायिक रेडियो प्रसारक संघ (अकोराब) को अध्यक्षमा अर्जुन गिरी निर्विरोध चयन भएका छन् । ललितपुरमा भइरहेको संघको १८ औँ वार्षिक साधारणसभा एवं आठौँ अधिवेशनबाट गिरी अध्यक्षमा निर्विरोध चयन भएका हुन् ।

गिरी दोस्रो कार्यकालका लागि अध्यक्षमा निर्वाचित भएको निर्वाचन समितिका संयोजक सुबोधबाबु चिलुवालले जानकारी दिए ।

उनका अनुसार वरिष्ठ उपाध्यक्षमा गोविन्द देवकोटा, उपाध्यक्ष (दलिततर्फ) गोपाल बराइली, महासचिवमा बन्दना दनुवार, सचिवमा भक्त स्याङ्तान, लेखा समिति संयोजकमा सङ्गीत बस्याल र सदाचार समितिको संयोजकमा टीकाजङ्ग थापा निर्विरोध चयन भएका छन् ।

वरिष्ठ उपाध्यक्षमा निर्वाचित देवकोटा अकोराबको यस अघि दुई कार्यकाल महासचिव भइसकेका छन् भने महासचिव दनुवार यस अघि एक कार्यकाल उपाध्यक्ष र एक कार्यकाल सचिव भइसकेकी छन् । यस्तै उपाध्यक्षमा निर्वाचित बराइली यस अघि नेपाल पत्रकार महासंघको केन्द्रीय सदस्य सदस्य थिए ।

यस्तै प्रदेश समितिका विभिन्न पदमा पनि पदाधिकारी निर्विरोध चयन भएका र निर्विरोध नभएका पदमा आइतबार निर्वाचन प्रक्रियाबाट चयन हुने निर्वाचन समितिले जनाएको छ ।

समितिका अनुसार आइतबार दिउँसो १ बजेपछि निर्वाचन हुने कार्यतालिका रहेको छ । एकल उम्मेदवारी परेका पदमा निर्विरोध निर्वाचित भएका हुन् भने एक भन्दा बढी व्यक्तिको उम्मेदवारी परेको पदमा निर्वाचन हुन लागेको हो ।