शिल्पीमा असोज २ बाट ‘मुक्कुमलुङ’

काठमाडौं । डा.चित्र माबोको कथासंग्रह ‘डोलीभर्ना’मा आधारित नाटक ‘मुक्कुमलुङ’ (विश्वासको शक्ति) काठमाडौंको बत्तीसपुतलीस्थित शिल्पी थिएटरमा असोज २ गतेदेखि २० गतेसम्म मञ्चन हुने भएको छ ।

रंगकर्मी पवित्रा राईको निर्देशन रहेको यस नाटकमा रेयर राई, दीपा सुहाङ, नुसा लिङ्देन, प्रमिला राई, प्रयास वान्तवा राई, शायोक मुकारुङ, दिवस पयांगु, उदय वेघा लिम्बु, स्मृति कुलमर, सुजु सुनुवार, रमिला मोक्तान, हिरन राई लगायत कलाकारको अभिनय रहेको छ । नाटकको परिकल्पना तथा नाट्य रुपान्तरण लेखक राजन मुकारुङले गरेका हुन् ।

ताप्लेजुङको सिरीजंघा गाउँपालिकाको उपाध्यक्षसमेत रहेका डा। माबोको कथासंग्रह ‘डोलीभर्ना’ केही समयअघि सांग्रीला बुक्सले बजारमा ल्याएको थियो ।पूर्वी पहाडी क्षेत्रको जनजीवन, त्यहाँ बसोबास गर्ने लिम्बु समाजको मुन्धुमी संस्कृति र अन्य समसामयिक विषयहरुमा लेखिएका १५ कथाहरु ‘डोलीभर्ना’मा संग्रहित छन् ।

मुक्कुमलुङलाई लिम्बु जातिले आस्थाको केन्द्र एवं मुन्धुमी थलोका रुपमा मान्ने गर्छन् । जुन क्षेत्र अहिले पाथीभराका नामले प्रसिद्ध छ । पछिल्लो समय निजी क्षेत्रको कम्पनीले त्यहाँ केबलकार बनाउने परियोजना अघि बढाउन खोजेपछि त्यसको चर्को विरोध भइरहेको छ ।