ध्रुवबहादुर प्रधानलाई प्रश्न- सहकारी घोटालामा रवि लामिछाने दोषी ठहर भएका हुन् ? (भिडिओ)

काठमाडौं । सहकारी ठगीका विषयमा छानबिनका लागि बनेको संसदीय समितिका सदस्य ध्रुवबहादुर प्रधानले रास्वपा सभापति रवि लामिछाने समितिको पहिलो प्राथमिकता नभएको बताएका छन् । समितिले प्रतिवेदन बुझाउनुअघि पत्रकारसँग संक्षिप्त कुराकानी गर्दै उनले सहकारी संकटको समाधानमाथि आफूहरू केन्द्रित रहेको बताए ।

उनले भने, ‘रवि लामिछानेजी टीओआरको पहिलो प्राथमिकता होइन । उहाँको विषय चौथो नम्बरको प्राथमिकतामा रहेको छ । हामीले सहकारी संकट समाधानका लागि व्यापक प्रयास गरेका छौं ।’

उनले लामिछाने संलग्न गोर्खा मिडियाबारे व्यापक छलफल भएको बताए । यो समिति गठन हुँदा लामिछाने गृहमन्त्री भएकाले राजीनामाको सन्दर्भसमेत रहेको तर अहिले माननीयमात्रै भएकाले उनलाई धेरै महत्व नदिइएको प्रधानको भनाइ छ ।

‘गोर्खा मिडियाको अर्थ संकलनका क्रममा सहकारीबाट रकम प्राप्त भएको देखियो । उहाँ गोर्खा मिडियाको प्रवन्ध निर्देशक भएका हिसाबले संलग्नता छ’, उनले भने ।

सहकारी रकम हिनामिनामा चैँ उहाँ दोषी हुनुहुन्छ कि हुनुहुन्न भन्ने पत्रकारको प्रश्नमा प्रधान पन्छिए ।

उनले भने, ‘अहिले मैले यति भनेँ । बाँकी कुरा अरुबाट सुन्नुस् ।’