६ वर्षपछि पुनः प्रदर्शित ‘तुम्बाड’ आफ्नै रेकर्ड तोड्दै, तीन दिनमा ७ करोडमाथि कमाइ

काठमाडौं । ६ वर्षपछि पुनः प्रदर्शन गरिएको फिल्म ‘तुम्बाड’ले तीन दिनमा सवा सात करोड भारु कमाइ गरेको छ । बक्स अफिस रिपोर्ट सार्वजनिक गर्ने स्याकनिल्कका अनुसार पहिलो दिन एक करोड ६० लाख भारुको ओपनिङ गरेको यस फिल्मले दोस्रो दिन दुई करोड ६० लाखको व्यापार गरेको थियो । तेस्रो दिन तीन करोडको व्यापार गरेको छ ।

सन् २०१८ मा प्रदर्शन भएको ‘तुम्बाड’ले त्यसवेला पहिलो दिन ५० लाख भारुको मात्रै कमाइ गरेको थियो । त्यसवेला यस फिल्मले सवा १२ करोड नेट कलेक्सन गरेको थियो । जबकि फिल्मको बजेट १५ करोड थियो । यसपटक पुनः प्रदर्शन हुँदा बक्स अफिसमा राम्रो गर्नुमा वर्ड अफ माउथ राम्रो भएको भारतीय मिडियाले उल्लेख गरेका छन् ।

राही अनिल बार्भे निर्देशित यस फिल्ममा सोहम शाह, ज्योति मल्से, धुन्दिराज प्रभाकरलगायत कलाकारको अभिनय छ । पुनः प्रदर्शन राम्रो भएपछि यस फिल्मको सिक्वेलको पनि घोषणा गरिएको छ ।