प्रफुल्लित मुद्रामा शिशिर खनालले भनेः रविजीले क्लीन चिट पाउनुभयो, अब राजनीति छोड्नु पर्दैन (भिडिओ)

काठमाडौं । सहकारी ठगीका विषयमा छानबिनका लागि बनेको संसदीय समितले प्रतिवेदन पारित गरेपछि रास्वपाका तर्फबाट सदस्य बनेका शिशिर खनाल प्रफुल्लित देखिए । उनले पत्रकारहरूसँग प्रतिवेदनको निस्कर्षबारे खुलेर प्रतिक्रिया पनि दिएका छन् ।

लामिछानेले सहकारीको रकम हिनामिना नगरेको निष्कर्ष प्रतिवेदनले निकालेको खनालको भनाइ छ । सहकारीबाट जीवी राईले गोर्खा मिडियामा ल्याएको रकम खर्च गर्ने सवालमा मात्रै लामिछाने जिम्मेवार देखिएको उनले बताए ।

‘एमडीको हैसियतमा रकम खर्च गर्दा यदि कुनै कानूनी दायित्व सिर्जना हुन्छ भने त्यो बहन गर्नुपर्छ भनेर लेखिएको छ । सहकारीको रकम अपचलनमा उहाँमाथि कुनै पनि कारवाही गर्न सिफारिस भएको छैन,’ खनालले भने ।

उनको थप भनाइः

यो समिति किन बनाइयो भन्दा रवीजीले सहकारीबाट पैसा लगेर खायो भन्ने आरोप लाग्यो । तत्कालीन अवस्थामा उहाँ गृहमन्त्री हुनुहुन्थ्यो । रविले लगेको पैसा अपचलनबारे छानविन हुनुपर्छ भनेर माग भएपछि समिति बनेको हो ।

तर, समितिको छानबिनमा सहकारीबाट पैसा निकाल्न कुनै पनि हिसाबले रवि लामिछानेको भूमिका देखिएन । जीवी राईसहित सहकारीका सञ्चालकहरुको योजनामा निर्देशनमा पैसा गएको देखिन्छ । जुन आधारमा समिति बनाइएको थियो, त्यो आधार नै यो समितिको तथ्यले प्रमाणित गरेन । रवीजीले सहकारीबाट एक सुका पनि लग्नुभएको देखिएन । सहकारी अपचलनमा उहाँको संलग्नता हुने प्रमाण भेटेनौं ।

जहाँसम्म गोर्खा मिडियाको सवाल छ, पैसा त सहकारीबाट आएको हो । स्वभाविक रूपमा उहाँ एमडी हुनुहुन्थ्यो । एमडीको रूपमा चेक साइन गरेको कुरामा कुनै कानूनी उत्तरदायित्व जन्मिन्छ भने त्यो उहाँले वहन गर्नुपर्छ । त्यो उत्तरदायित्व बहन गर्ने कामकारवाही अगाडि बढाउन भनिएको छ । उदाहरणका लागि आज कान्तिपुर टेलिभिजनका एमडीले चेक साइन गरेर तलव आइरहेको छ भने त्यसको उत्तरदायित्व जति हुन्छ, त्यति रविको हुन्छ ।

रविले क्लीन चिट पाउनुभएको हो ? भन्ने पत्रकारको सवालमा उनले जवाफ दिए, ‘जुन आरोप उहाँलाई लगाइएको थियो, हामीसित हिनामिनाको तथ्यप्रमाण छ भनिएको थियो, त्यसबाट पूर्णरुपमा क्लीनचिट पाउनुभएको छ ।’

उहाँले दोषि प्रमाणित भए राजनीति छोड्छु भन्नुभएको थियो, अब छोड्नु पर्दैन ?

‘हो, त्यो अब पर्दैन ।’