म्यानपावर व्यवसायीका शाखा कार्यालय नवीकरण गर्न वैदेशिक रोजगार विभागको आग्रह

काठमाडौँ । वैदेशिक रोजगार विभागले म्यानपावर व्यवसायीका शाखा कार्यालय नवीकरण गर्न आग्रह गरेको छ । विभागले असोज मसान्तभित्र आवश्यक कागजातसहित नवीकरणका लागि निवेदन दिइसक्न आग्रह गरेको हो ।

वैदेशिक रोजगार ऐन, २०६४ ले वैदेशिक रोजगार व्यवसाय सञ्चालन गर्न इजाजतपत्र प्राप्त संस्थाले हरेक वर्ष नवीकरण गर्नुपर्ने व्यवस्था गरेको छ । त्यस्तै स्वदेशमा शाखा कार्यालय सञ्चालन सम्बन्धी कार्यविधि, २०७९ ले शाखा कार्यालयको प्रत्येक आर्थिक वर्षको असोज मसान्तभित्र नवीकरण गर्नुपर्ने भनेको छ ।

त्यसै व्यवस्था अनुसार असोज मसान्तभित्र नवीकरण गर्न विभागले आग्रह गरेको विभागका सूचना अधिकारी समेत रहेका निर्देशक गुरुदत्त सुवेदीले जानकारी दिए । उनका अनुसार शाखा कार्यालय नवीकरणका लागि १ हजार रुपैयाँ शुल्क लाग्नेछ ।

नवीकरणका लागि इजाजतपत्र प्राप्त संस्थाको दर्ता प्रमाणपत्र (नवीकरण), अघिल्लो आर्थिक वर्षको कर चुक्ता प्रमाणपत्रको प्रतिलिपि, शाखा कार्यालय सञ्चालन अनुमति पत्रको प्रतिलिपि, शाखा कार्यालय नवीकरण गर्ने सम्बन्धी सञ्चालक समितिको निर्णय पेस गर्नुपर्नेछ ।

त्यस्तै नवीकरण सम्बन्धी निवेदन, शाखा दर्ता गर्दा पेश गरेको नगद धरौटी प्रतिलिपि, बैंक ग्यारेन्टीको प्रतिलिपि, शाखा प्रमुखको र अन्य कर्मचारीको विवरण र नियुक्ति पत्र, शाखा कार्यालय रहने घरको घर बहाल सम्झौताको विवरण पेस गर्नुपर्ने जनाइएको छ ।