हरर कमेडी चलचित्र ‘फिरफिरे फिरिरी’ को फर्स्टलुक सार्वजनिक

काठमाडौं । हरर कमेडी जनरामा बनेको चलचित्र ‘फिरफिरे फिरिरी’ को फर्स्टलुक पोस्टर सार्वजनिक गरिएको छ ।

विन्दवासिनी क्रियसनद्वारा निर्मित चलचित्र ‘फिरफिरे फिरिरी’ मनोजकुमार अधिकारीले निर्माण गरेका हुन् । ‘नौ डाँडापारि’, ‘मंगलसूत्र’ आदि चलचित्र निर्माण गरेका निर्माता अधिकारी करिब १५ वर्षपछि फेरि चलचित्र निर्माणमा फर्किएका हुन् ।

सन्दीप श्रेष्ठ र नवीन भट्टको लेखन रहेको चलचित्र ‘फिरफिरे फिरिरी’ले दर्शकलाई पूर्ण मनोरञ्जन प्रदान गर्नेमा निर्माण टीम ढुक्क छ । यसै चलचित्रबाट सन्दीप श्रेष्ठ र भावना उप्रेतीले नेपाली रजतपटमा डेब्यु गर्दैछन् ।

नवीन भट्टको निर्देशनमा बनेको चलचित्रको पोस्टरमा चार जना पात्रलाई प्राथमिकता दिइएको छ । स्कुटीमा बसिरहेकी युवतीलाई ३ युवाले तानातान गर्दै गरेको देखाइएको छ ।

चलचित्रको फर्स्टलुकसँगै प्रदर्शन मिति घोषणा गरिएको छ । चलचित्र आगामी कार्तिक २२ गते छठ पर्वको दिन प्रदर्शनमा आउनेछ । चलचित्रको सार्वजनिक पोस्टर अनन्त घिमिरेले डिजाइन गरेका हुन् ।

चलचित्रमा मनोजकुमार अधिकारी, सन्दीप श्रेष्ठ, भावना उप्रेती, शंकर सेढाईं, पिटर प्रिन्स, रविना केसी, पुष्प अवस्थी, सूर्यमान लिम्बूलगायतका कलाकारको अभिनय रहेको छ। चलचित्रमा जितु तामाङको छायांकन, रोशन दास, प्रकाश दाहाल र अग्नि सुवेदीको सहायक निर्देशन, केशवराज भट्टको कोरियोग्राफी, एलिस कार्कीको ब्याकग्राउन्ड म्युजिक, प्रशान्त सिवाकोटीको संगीत, अमित श्रेष्ठको साउन्ड डिजाइन, अनन्त घिमिरेको सम्पादन तथा कलर संयोजन रहेको छ ।

चलचित्रलाई देशभर आरआर फिल्म्सले वितरण गर्नेछ । चलचित्रको डिजिटल अधिकार म्युजिक नेपालले लिएको छ।