राजु लामाले ल्याए ‘प्रेम रोग’

काठमाडौं । गायक राजु लामाले नयाँ गीत सार्वजनिक गरेका छन् । चर्चित ब्यान्ड मंगोलियन हार्टका लिड भोकलिस्ट राजुले ‘प्रेम रोग’ बोलको रोमान्टिक गीत बजारमा ल्याएका हुन् ।

राजुकै शब्द र संगीत रहेको गीतको भिडियोमा उनकै अभिनय छ । उनीसँग अभिनेत्री करिष्मा श्रेष्ठले स्क्रिन सेयर गरेकी छन् । पवन सुस्लिङको छायांकन तथा सम्पादन रहेको यो गीतको भिडियो कोरियोग्राफी सोनम पाख्रिनले गरेका छन् । गीतको भिडियो निर्देशन पनि सोनम पाख्रिनले नै गरेका हुन् ।

गीतले संगीतको पछिल्लो ट्रेन्ड झल्काउने राजु बताउँछन् । ‘यो इलेक्ट्रोनिक डान्स म्युजिक हो । गीतले युवतीसँग गहिरो प्रेममा रहेको एक युवकको कथा भन्छ’, उनले भने, ‘नयाँ स्वाद दिने प्रयत्न गरेको छु । दर्शकश्रोताले अपनत्व लिएर सुन्छन् र हेर्छन् भन्ने मेरो विश्वास छ ।’