जोखिममा काम गर्ने पत्रकारको राज्यले संरक्षण गर्छ : मन्त्री गुरुङ

काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले लोकतान्त्रिक आन्दोलनलाई सफल तुल्याउनेदेखि समाजलाई सुसूचित गर्न सञ्चार क्षेत्रले जोखिममा रहेर पनि काम गरिरहेको बताएका छन् ।

नेपाल पत्रकार महासंघ, नेपाल टेलिभिजिन प्रतिष्ठान शाखाले आइतबार यहाँ आयोजना गरेको ‘हेम-सुनिल जोखिमपूर्ण टेलिभिजन पत्रकारिता पुरस्कार’ वितरण समारोहमा उनले बेथिति र विसंगतिविरुद्ध आवाज उठाउने पत्रकारिता क्षेत्रको संरक्षण गर्न राज्यले ध्यान दिइरहेको बताए ।

‘न्यूनतम पारिश्रमिकसमेत नपाउने स्थिति झेलेर पनि पत्रकारले आफ्नो धर्म निर्वाह गरिरहेका छन्, पत्रकार हरेक हिसाबले जोखिममा छन्, यद्यपि, आफ्नो जिम्मेवारी पूरा गरिहएका छन्’, उनले भने, ‘यस क्षेत्रको सुरक्षा गर्ने दायित्व राज्यको हो र हामीले अब नीति र कानुन बनाएर पत्रकारिता जगत्लाई सहज बनाउन लागेका छौँ ।’

सार्वजनिक सेवा प्रसारण ऐनलाई चाँडै नै कार्यान्वयनमा ल्याइने जानकारी गराउँदै मन्त्री गुरुङले नेपाल टेलिभिजन र रेडियो नेपालको समायोजनलाई व्यवस्थित बनाइने बताए ।

मन्त्रालयका सचिव राधिका अर्यालले सार्वजनिक सेवा प्रसारण ऐन कार्यान्वयनमा दुवै निकायले सहयोग गर्नुपर्नेमा जोड दिए । ‘मन्त्रालयले यसवर्ष कानुन निर्माण गर्ने विषयलाई उच्च प्राथमिकतामा राखेको छ, कानुन निर्माणमा सबैको साथ जरुरी छ’, उनले भने ।

पाँच पत्रकारलाई हेम-सुनिल जोखिमपूर्ण टेलिभिजन पत्रकारिता पुरस्कार

सो अवसरमा यस वर्षको हेम-सुनिल जोखिमपूर्ण टेलिभिजन पत्रकारिता पुरस्कार कान्तिपुरकर्मी होम कार्की, प्रकाश तिमल्सिना र श्याम श्रेष्ठ तथा नेपाल टेलिभिजनकर्मी दुर्गाकुमारी भट्ट र विपिन श्रीवास्तवलाई प्रदान गरिएको छ ।

मन्त्री गुरुङले पुरस्कृत पाँच पत्रकारलाई संयुक्त रुपमा रु एक लाख र ताम्रपत्र प्रदान गरे । युद्धग्रस्त मुलुक इजरायलमा पुगेर कान्तिपुरकर्मीले स्थलगत ‘रिपोर्टिङ’ गरेका गरेका थिए भने नेपाल टेलिभिजनकर्मीले दार्चुलाको दुर्गम अपी हिमाल क्षेत्रको स्थलगत रिपोर्टिङ गरेका थिए ।

पुरस्कृत कान्तिपुरकर्मी कार्कीले इजरायलबाट हमास–इजराइल युद्धको रिपोर्टिङ गर्दाको अनुभव सुनाए । ‘हामीले अन्धाधुन्द गोली र मिसाइल बज्रिरहेको अवस्थामा पत्रकारिता गर्यौं’, उनले भने, ‘ज्यानकै असुरक्षा हुँदा पनि पत्रकारले रिर्पोटिङ नगरी बस्न मनले मान्दो रहेनछ, युद्ध क्षेत्रमा पुगेर रिर्पोटिङ गर्नु आफैँमा जोखिम थियो ।’

पुरस्कार छनोट समितिमा रहनुभएका राष्ट्रिय समाचार समिति (रासस)का कार्यकारी अध्यक्ष धर्मेन्द्र झाले विषयको छनोट, परिवेश, दृश्य र त्यसको प्रभावसमेतलाई मूल्याङ्कन गरेर पुरस्कार छनोट गरिएको बताए । ‘पत्रकारिता आफैँमा जोखिमपूर्ण हुन्छ’, उनले भने, ‘यस पुरस्कारले हरेक पत्रकारलाई जोखिम मोल्न सक्ने ऊर्जा प्रदान गर्न मद्दत गर्छ ।’

नेपाल टेलिभिजनका कार्यकारी अध्यक्ष समीरजङ्ग शाहले जोखिमपूर्ण क्षेत्रमा खटिइएर पत्रकारिता गर्न पुरस्कारले ऊर्जा प्रदान गर्ने बताए । नेपाल टेलिभिजनका महाप्रबन्धक फुलमान बल तामाङले सकेसम्म जोखिम मोलेर पत्रकारिता गर्नुपर्ने स्थिति राज्यमा सिर्जना नहोस् भन्ने कामना गरे ।

नेपाल पत्रकार महासङ्घका कार्यवाहक अध्यक्ष बाला अधिकारीले सदस्य शुद्धीकरणका विषयले महासङ्घको निर्वाचन लम्बिएको जनाउँदै चाँडै नै निर्वाचन गराउन प्रतिबद्धता व्यक्त गरे । नेपाल पत्रकार महासङ्घ टेलिभिजन शाखाका अध्यक्ष दीपकजङ्ग हमालले राज्यले सुरक्षित पत्रकारिता गर्ने कानूनी आधार सिर्जना गराउन आग्रह गरे ।

पत्रकार महासंघ, नेपाल टेलिभिजन शाखाले २०६४ सालदेखि पत्रकारद्वय हेमराज भण्डारी र सुनिल सिंहको स्मृतिमा रु एक लाख राशीको उक्त पुरस्कार प्रदान गर्दै आइरहेको छ । पुरस्कार छनोट समितिमा झासहित वरिष्ठ सञ्चारविद् मन्टेश्वरी राजभण्डारी, नेपाल पत्रकार महासंघका कोषाध्यक्ष कलेन्द्र सेजुवाल, नेपाल टेलिभिजनका कार्यकारी अध्यक्ष शाह, समाचार प्रमुख पुष्पहरि क्याम्पा राई र प्रतिष्ठान अध्यक्ष हमाल सदस्य थिए ।

सो अवसरमा नेपाल टेलिभिजनका ज्येष्ठ कर्मचारी सरस्वती शर्मा र सुधीरकुमार मिश्रसमेतलाई सम्मान गरिएको थियो ।