बाढीपहिरोको कारण ‘आँखा’ को प्रदर्शन स्थगित

काठमाडौं । गत शुक्रबाट रिलिज भएको चलचित्र ‘आँखा’ को प्रदर्शन रोकिएको छ । बाढी पहिरो र प्राकृतिक विपत्तिका कारण चलचित्रको प्रदर्शन स्थगित गर्नुपरेको बताउँदै निर्माण टीमले सोमबारदेखि चलचित्रको प्रदर्शन रोकेको हो ।

निर्माता जौन योन्जनले विज्ञप्ति जारी गर्दै प्रदर्शन रोकिएको जानकारी दिएका हुन् ।

‘हालको बाढी पहिरो र प्राकृतिक विपत्तिका कारण जनमानसलाई आवतजावत गर्न समेत कठिन भएको परिपेक्षमा सबैभन्दा पहिला आम मानिसको जनधनको सुरक्षालाई पहिलो प्राथमिकतामा राखेर हामीले हाललाई फिल्म आँखालाई केही समयका लागि प्रदर्शन स्थगित गरेका छौं । यो निर्णयबाट प्रदर्शक र दर्शकलाई परेको असुविधाप्रति हामी क्षमाप्रार्थी छौं ’, विज्ञप्तिमा उल्लेख छ ।

उनले सहज वातावरण भएपछि चलचित्रलाई पुनः प्रदर्शनमा ल्याउने विज्ञप्तिमा जनाएका छन । यहीँ कारण बताउँदै आइतबारबाट चलचित्र ‘सानो संसार’ को पनि प्रदर्शन रोकिएको थियो ।

सुकुम्बासी बस्तीको कथामा निर्माण भएको चलचित्र ‘आँखा’ मा जौन योन्जनको निर्माण एवं निर्देशन छ । चलचित्रमा स्मिता लामिछाने र आरके मेहता शीर्ष भूमिकामा छन् भने विजय बराल, निशा अधिकारी, बुद्धि तामाङ, सरोज खनाल, पशुपति राई, कृष्णभक्त महर्जन, राजन खतिवडा, प्रवीण खतिवडा, लुनिभा तुलाधर, अभयराज बराल र बाल कलाकार प्रसन राईँले अभिनय गरेका छन् ।