कैलालीमा मोटरसाइकल दुर्घटनामा दुई जनाको मृत्यु, एक जना घाइते

धनगढी । कैलालीमा मोटरसाइकल एक आपसमा ठोक्किँदा दुई जनाको मृत्यु भएको छ ।जिल्ला को गौरीगङ्गा नगरपालिका-१ गोप्कामा पश्चिमबाट पूर्वतर्फ गइरहेको से ६ प ६२७९ र विपरीत दिशाबाट आइरहेको बा ९५ प ९२५२ नम्बरको मोटरसाइकल ठोक्किँदा दुवैका चालकको मृत्यु भएको जिल्ला प्रहरी कार्यालय कैलालीले जानकारी दिएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक (डिएसपी) कबिन्द्रसिंह बोहराका अनुसार दुर्घटनामा जानकी गाउँपालिका–८ बस्ने २० वर्षीय निर्मल चौधरी र कञ्चनपुरको शुक्लाफाँटा नगरपालिका–७ का २६ वर्षीय चिरञ्जीवी मल्लको मृत्यु भएको हो ।

चौधरी से ६ प ६२७९ नम्बरको मोटरसाइकल र मल्ल बा ९५ प९२५२ नम्बरको मोटरसाइकलका चालक हुन् । दुर्घटनामा गम्भीर घाइते भएका दुवै जनालाई राति नै धनगढीको नवजीवन अस्पताल पुगाइएको थियो । उपचारको क्रममा उनीहरूको मृत्यु भएको प्रहरीले जनाएको छ । उनीहरूको शव परीक्षणका लागि सेती प्रादेशिक अस्पतालमा राखिएको छ ।

बा ९५ प ९२५२ नम्बरको मोटरसाइकल पछाडि सवार कञ्चनपुरको शुक्लाफाँटा नगरपालिका– ७ का २२ वर्षीया दीपक बोहरा पनि घाइते भएका छन् । उनको नवजीवन अस्पतालमा उपचार भइरहेको छ ।