त्रिपुरेश्वरस्थित विश्वनितेकन माविमा बाढीले करोड बढीको क्षति
नेपाल प्रेस
२०८१ असोज १५ गते ९:२६
काठमाडौं । त्रिपुरेश्वरस्थित विश्वनिकेतन माध्यमिक विद्यालयमा बाढीले ठूलो क्षति पुर्याएको छ ।
गत बिहीबारदेखि शनिवार साँझसम्मको भारी वर्षासँगै आएको बागमती नदीको बाढी विद्यालयमा पसेको हो । बाढीका कारण भुईँतलामा रहेका फर्निचर र कम्प्युटर ल्याबका साथै महत्त्वपूर्ण कागजपत्र तथा शैक्षिक सामग्रीहरू नष्ट भएको विद्यालयका शिक्षक डिल्लीराम पौडेलले जानकारी दिए ।
उनका अनुसार डुबानमा परेर विद्यार्थी बोक्ने दुईवटा स्कुल बस बिग्रिएका छन् । दुवै बसको इन्जिनमा समस्या देखिएको छ ।
पौडेलका अनुसार ल्याबमा रहेका ३० थान ल्यापटप प्रयोग गर्नै नमिल्ने गरी बिग्रिएका छन् ।
सबै गरी एक करोडभन्दा बढीको धनमाल क्षति भएको प्रारम्भिक अनुमान गरिएको विद्यालयले जनाएको छ ।
भुईँ तलामा बाढी पसेका कारण नर्सरीदेखि कक्षा ३ सम्मका विद्यार्थीको पठनपाठन प्रभावित भएको छ । दसैँ बिदाअघि सुरु हुनुअघि नै ती विद्यार्थीलाई तिहारसम्मका लागि बिदा दिइएको छ ।
नेपाल प्रेस
प्रकाशित: २०८१ असोज १५ गते ९:२६
प्रतिक्रिया
सम्बन्धित खवर
