जितु नेपालले सार्वजनिक गरे चलचित्र ‘ज्वाइँ साब’ बाट आफ्नो बुढ्यौली लुक्स

काठमाडौं । कलाकार जितु नेपालको प्रमुख भूमिका रहेको चलचित्र ‘ज्वाइँ साब’ रिलिजको तयारीमा छ । यही असोज २४ गतेबाट प्रदर्शनमा आउन लागेको यो चलचित्रको पोस्टर, टिजर र गीत पनि रिलिज भइसकेका छन् ।

यही मेसोमा जितुले आफ्नो बुढ्यौली गेटअपको पोस्टर आफ्नै सामाजिक सञ्जालमार्फत सार्वजनिक गरेका छन् । पोस्टरमा जितुलाई गोवर्द्धन पण्डितको रुपमा चित्रण गरिएको छ ।

जितुलाई बुड्यौली दर्शाउने चस्मा र सोही अनुरुपको पहिरनमा खुईलिएको तालुले चरित्र बुझाउने प्रयास गरिएको छ । उनको यो गेटअपले फिल्ममा कतै जितुको दोहोरो भूमिकामा त छैन भन्ने कौतुहलता पनि जगाएको छ । जितुको दोहोरो भूमिका हो वा होइन भन्ने बारे भने निर्माण पक्षले केही खुलाएको छैन ।

जितु यतिबेला चलचित्रको प्रोमोसनमा व्यस्त छन् । राजकुमार पण्डित प्रस्तुतकर्ता रहेको चलचित्रमा वसन्त निरौलाको निर्देशन छ । चलचित्रमा जितु नेपालका अलावा निती शाह, बुद्धि तामाङ, हिमेश पन्त, रमेश बुढाथोकी, प्रकाश घिमिरे, शिशिर वाङ्देल, दीपक आचार्यलगायतका कलाकारको अभिनय छ ।