सलोन बस्नेत प्रस्तुतकर्ता रहेको चलचित्र ‘रंगी’ को स्क्रिप्ट पूजा

काठमाडौं । सलोन सलिना फिल्मस् प्रालिको ब्यानरमा बन्न लागेको चलचित्र ‘रंगी’ को स्क्रिप्ट पूजा गरिएको छ । सलोन बस्नेत प्रस्तुतकर्ता रहने चलचित्रको घटस्थापनाको अवसर पारेर बिहीबार राजधानीको कमलादीस्थित गणेशस्थान मन्दिरमा स्क्रिप्ट पूजा गरिएको हो ।

सुरेश न्यौपानेको ‘डेब्यू’ निर्देशन रहने चलचित्रको स्क्रिप्ट पूजामा सलोन बस्नेत, नम्रता श्रेष्ठ, निर्देशक सुरेशलगायतको उपस्थिति थियो । चलचित्रमा सलोन बस्नेत, नम्रता श्रेष्ठ, दिलीप रायमाझी, आरुषी कार्की, विशाल पहारी र सुमिन गुरुङको अभिनय रहनेछ भने चलचित्रको छायांकन कार्तिक ५ गतेबाट सुरु हुनेछ ।

निर्माण पक्षले चलचित्रको टाइटल पोस्टर सार्वजनिक गरिसकेको छ । सक्षम सुवेदीको निर्माण रहने चलचित्रमा सुमन गजमेरको लेखन, सौरभ लामाको छायांकन, दुर्गेश थापा, आमेश भण्डारी र भीम बिसीको संगीत, कविराज गहतराज र शिशिर खातीको कोरियोग्राफी तथा केवलमान सिंह बस्नेतको प्रोडक्सन हुनेछ ।