नेटो प्रमुख नियुक्त भएको दुई दिनलगत्तै युक्रेन पुगे मार्क

काठमाडौं । अमेरिकी तथा अमेरिकी नेतृत्वका यूरोपेली देशहरुको सैन्य संगठन नेटोको प्रमुख भएको दुई दिनपछि मार्क रट्ट युक्रेन पुगेका छन् । जर्मनीको विश्व च्यानल डिडब्लूका अनुसार ३२ देशको सैन्य सगठनका प्रमुख मार्क रट्टले आजबाट युक्रेनको भ्रमण सुरु गरेका छन् । उनी राजधानी किभमा ओर्र्लिलएका छन् ।

नेदरल्याण्डका पूर्वप्रधानमन्त्रीसमेत रहेका मार्कले युक्रेन भ्रमणमा राष्ट्रपति भोलोदिमिर जेलेन्स्कीसँग भेट गरेका छन् । उनले राजधानी किभमा भेट गर्दा आक्रमणमा हुँदा सजगता अपनाउन बजाइने साइरन बजेको थियो । उनले युक्रेनमा बोल्दै युक्रेन अहिले नेटोसँग सबैभन्दा धेरै नजिक भएको भन्दै यो निकटता युक्रेन पूर्ण सदस्य हुन्जेल हुने बताए ।

नेटो सदस्य बन्न युक्रेनले कदम चलाउँदा रुसले गरेको आग्रह नटेरेपछि रुसले युक्रेनमा हमला सुरु गरेको थियो । युक्रेन युद्धलाई रुस र युक्रेनको मात्रै नभएर रुस र नेटोको युद्ध भएको धेरैले मान्दै आएका छन् । नेटो सदस्यहरुले धमाधम हतियार, गुप्तचर, भाडाका सिपाही तथा सैन्य प्रशिक्षकहरु दिएर युद्ध भएकोले रुसी राष्ट्रपति भ्यादिमिर पुटिनले यो युद्ध नेटो र रुसको भएको भन्दै आएका छन् ।