काठमाडौं महानगरले नउठाएको त्रिपुरेश्वर-टेकु क्षेत्रको फोहोर अखिलले उठायो (भिडिओ)

काठमाडौं । काठमाडौंमा आएको बाढी तथा डुबानबाट भएको फोहोर काठमाडौं महानगरले नउठाएपछि विद्यार्थी संगठन अखिल राष्ट्रिय स्वतन्त्र विद्यार्थी युनियन (अनेरास्ववियु)ले उठाएको छ ।

नेकपा एमाले निकट अनेरास्ववियुले काठमाडौँका सुकुम्वासी बस्तीमा थुपारिएको फोहोर व्यवस्थापन गरेको हो । अनेरास्वयवियु महासचिव नरेश रोकायाको नेतृत्वमा काठमाडौँ जिल्ला कमिटीले काठमाडौंको त्रिपुरेश्वर लगायतका सुकुम्वासी बस्तीको फोहोर व्यवस्थापन गरेको हो ।

रोकायाका अनुसार उक्त क्षेत्रमा भएका १९३ मध्ये १८८ घर डुबानमा परेका छन् । त्यहि क्षेत्रमा बढेको फोहोर उठाइएको हो । ‘विद्यार्थीहरुको पहलमा हामीले १२ टिपर फोहोर उठायौं’, महासचिव रोकायाले नेपाल प्रेसलाई भने ।

काठमाडौं महानगरले फोहोर व्यवस्थापनमा ढिलाइ गरेपछि अनेरास्ववियुले डोजर लगाएर फोहोर व्यवस्थापन गरेको हो ।

अनेरास्ववियु फोहोर उठाएर टेकु स्थित डम्पिङ साइडमा व्यवस्थापन गरिरहेको छ ।

फोहोरबाट महामारी प्रकोप फैलिने त्रास उत्पन्न भएपछि अनेरास्ववियुले उक्त पहलकदमी लिएको सङ्गठनका केन्द्रीय सचिव सन्जिब धितालले जानकारी दिए ।

‘काठमाडौं महानगरले सुकुम्बासी बस्तीमा चासो दिएन, स्थानीयले हामीलाई सहयोग मागे,’ उनले भने, ‘हामीले फोहोर उठाएर टेकुस्थित डम्पिङ साइडमा व्यवस्थापन गरिरहेका छौँ ।’

अनेरास्ववियुको स्वयंसेवक टोली विपत प्रभावित क्षेत्रमा परिचालन भएको र संगठनका सचिव डा.सुजन कडरियाको नेतृत्वमा स्वास्थ्य उपचार शिविर समेत सन्चालन गरिएको महासचि नरेश रोकायले बताए ।