डिमेन्सियासम्बन्धी चेतनामूलक गीत ‘कान्छा बा’ को म्युजिक भिडिओ बजारमा

काठमाडौं । डिमेन्सिया रोगसम्बन्धी जनचेतनामूलक म्युजिक भिडिओ ‘कान्छा बा’ सार्वजनिक गरिएको छ ।

वरिष्ठ गीतकार सुवासचन्द्र ढुंगेलको शब्द रचना, संकेत अगस्तीको संगीत, पुस्पन प्रधानको स्वरमा सजिएको उक्त गीतको संगीत संयोजन सन्जीव बराइली र मिक्स मास्टरिङ नरेश बीबीसीले गरेका छन् । अभिनेता सरोज खनाल भिडिओको मुख्य भूमिकामा छन् भने उनलाई कमल सिंह र मिशेल घिमिरेले साथ दिएका छन् ।

सहायक पात्रहरुमा श्रेय अगस्ती, प्रीति तामाङ, मनकुमार राई र रमेश पराजुली छन् । दिनेश पराजुलीको छायांकन, पुनम चौधरीको शृंगार, विकास धमलालाद्वारा सम्पादित म्युजिक भिडिओको कथा साक्षी श्रेयको रहेको छ । रत्नशोभा ढुंगेलको निर्माणमा बनेको ‘कान्छा बा’ निकेश खड्काले निर्देशन गरेका छन् ।

बिर्सिने रोग (डिमेन्सिया) बाट पीडित कान्छा बाले आफ्नो दिनचर्यामा भोग्नुपरेको पीडाले चिन्तित छोराबुहारीको अभिव्यक्तिपश्चात चित्त दुखाएर घरबाट आफ्नै यात्रामा निस्किएको कथावस्तुलाई म्युजिक भिडि‌ओमा समेटिएको छ ।

बुढा आमाबालाई माया र साथ दिन सके डिमेन्सियाजस्तो रोगलाई निवारण गर्न सकिने म्युजिक भिडिओमा सन्देश दिन खोजिएको छ ।