भुटानमा पूर्वराजा ज्ञानेन्द्रलाई न्यानो आतिथ्य, राजपरिवारसँग भेटवार्ता जारी

काठमाडौं । भुटान भ्रमणमा रहेका पूर्वराजा ज्ञानेन्द्र शाहले त्यहाँको राजपरिवारबाट न्यानो आतिथ्य पाएका छन् । भुटानी राजपरिवारका सदस्यहरुसँग पूर्वराजाको भेटवार्ता जारी रहेको छ ।

पूर्वराजा ज्ञानेन्द्रलाई वातावरण संरक्षण क्षेत्रका शिखर व्यक्तित्वको हैसियतमा भुटान आमन्त्रण गरिएको हो । अधिराजकुमार छँदा उनी श्री ५ महेन्द्र प्रकृति संरक्षण कोषका अध्यक्ष थिए र वातावरण संरक्षणका क्षेत्रमा थुप्रै पहलहरु गरेका थिए । भुटान सरकारले हालै ‘भुटान नवप्रवर्तन वृहत् अन्तर्राष्ट्रिय सम्मेलन’ आयोजना गरेको छ । यही सन्दर्भमा पूर्वराजालाई भुटानी राजाले निम्ता गरेका हुन् ।

भुटानको राष्ट्रिय ध्वजावाहक ड्रुक एयरबाट पूर्वराजा ज्ञानेन्द्र हिजो भुटानको राजधानी थिम्पुमा रहेको पारो अन्तर्राष्ट्रिय विमानस्थलमा अवतरण भएका थिए । उनलाई भुटानी राजकुमारी पेमा ल्हादेन वाङ्चुकले विमानस्थलमै पुगेर स्वागत गरेकी थिइन् । पूर्वराजाको स्वागतमा बिमानसम्म रेड कार्पेट ओछ्याइएको थियो ।

विमानस्थलबाट राजकीय अतिथिगृह पुर्‍याइयो, जहाँ शाही धर्मगुरूहरुले अभिषेक र आशीर्वचन प्रदान गरे । सो पश्चात पूर्वराजा विभिन्न भेटघाटहरुमा व्यस्त छन् । उनले भुटानका बडामहाराज (हालका राजाका पिता) जिग्मे सिग्मे वाङचुकसँग भेटवार्तां गरे । डेचेन छोलिङ राजाप्रसादमा सो भेटवार्ता भएको छ । उनीहरु दुवै दार्जिलिङको सेन्ट जोसेफ कलेजका सहपाठी थिए ।

यसैगरि, भुटानी मुमा बडामहारानीसँग पनि पूर्वराजाले भेट गरेका छन् । भेटमा पूर्वराजा ज्ञानेन्द्रसँगै छोरी प्रेरणा र भतिजी सिताष्मा समेत सहभागी थिए । नेपाली राजकीय प्रतिनिधीमण्डललाई थिम्पुबाट २४३ किमी दक्षिणपूर्वमा अवस्थित ‘गलेपू माइन्डफूल सस्टेनेबल सिटी’ योजनाको अवलोकन गराइने छ ।

भारतसँग सीमा जोडिएको गलेपू योजनावद्ध शहर २५०० वर्ग किमी क्षेत्रफलमा फैलिएको छ, जून क्षेत्रफलका आधारमा सिंगापुरभन्दा पनि ठूलो रहेको छ ।

३५ वटा नदी मिसिएर बनेको मानस नदीको घाटी क्षेत्रमा अवस्थित ‘गलेपू माइन्डफूल सस्टेनेबल सिटी’ लाई भूटानी राजा जिग्मे खेसर वाङचुकको परिकल्पना अनुसार विकास गरिन लागेको हो ।

आर्थिक र सूचना प्रविधि केन्द्रको रूपमा विकास गरिने यस शहरका अधिकांश भौतिक संरचना पूलहरूमाथि निर्माण गरिने लक्ष्य राखिएको छ । सभागृह, अस्पताल, विद्यालय, डिपार्टमेन्ट स्टोर, होटेल, बजार, सफ्टवेयर कम्पनी आदि समेत पूलहरू माथि नै बनाइने परिकल्पना गरिएको छ । यो विश्वकै पहिलो बाढी–पहिरोरहित आधुनिक शहरीकरण आयोजना हुनेछ ।

भुटानले ‘गलेपू माइन्डफूल सस्टेनेबल सिटी’लाई विशेष प्रशासकीय क्षेत्र घोषणा गरिसकेको छ, जसका प्रमूख नेपाली मूलका भूटानी नागरिक डिएन दाहाल रहेका छन् ।
(सूचना/तस्विरः रमा सिंहको फेसबुक)