सत्तामा आएको दश महिनापछि भारत भ्रमणमा माल्दिभ्सका राष्ट्रपति मैजु

काठमाडौं । दश महिना अगाडि चुनाव जितेर आएका राष्ट्रपति महोमद मैजु भारत भ्रमणमा गएका छन् । उनको आज सुरु भएको भारत भ्रमण यसकारण महत्वपूर्ण छ कि उनले भारत पहिले भ्रमण गर्ने प्रचलन तोडेर पहिलो औपचारिक भ्रमणमा टर्की र पहिलो राजकीय भ्रमणमा चीन पुगेका थिए ।

भारतीय समकक्षी द्रौपदी मुर्मुको निमन्त्रणामा मैजु भारत भ्रमणमा गएका हुन् । माल्दिभ्समा रहेका भारतीय सैनिक फिर्ता गर्ने इण्डिया आउट मुद्दा लिएर चुनाव जितेका उनले भारतसँगको हाइड्रोग्राफिक सर्वे भने नवीकरण नगर्ने बेलायती विश्व च्यानल बीबीसीसँग बताएका छन् ।

पाँच दिने भारत भ्रमणमा उनले समकक्षी मुर्मुका साथै प्रधानमन्त्री मोदी र अरु उच्च अधिकारीहरु भेट्ने कार्यक्रम तय भएको माल्दिभ्सको मिडिया सनले उल्लेख गरेको छ । मैजु र मोदीबीच यसअगाडि दुई पटक भेट भइसकेको छ । दुबईमा भएको कोप २८ र मोदीको शपथग्रहण कार्यक्रममा उनीहरुको भेट भएको थियो । भारतको राजकीय भ्रमण भने यो पहिलो हो ।