छक्का पञ्जा ५ को ट्रेलर शेयर गर्दै पूजा शर्माले भनिन्- एक/दुई जनाको रिसले धेरैको सपनामा लात्ती नहानौं

काठ्माडौं । नायिका पूजा शर्माले चलचित्र ‘छक्का पञ्जा ५’ को ट्रेलर शेयर गर्दै सबैलाई मनमा बत्ति बाल्न सुझाव दिएकी छन् । उनले सोमवार आफ्नो सामाजिक संजालमा सानो स्टाटस लेख्दै ‘छक्का पञ्जा ५’को ट्रेलर शेयर गरेकी हुन् ।

उनले लेखेकी छन्, ‘मन्दिरमा होइन हजुर, मनमा बत्ति बाल्नुहोस । नकारात्मक सोचले हुने केही होइन । सबैको राम्रो सोचम । १,२ जनाको रिसले धेरै जनाको सपनालाइ लात्ती हान्ने काम नगरम ।’

यही असोज २४ अर्थात् फूलपातीको दिनबाट दीपकराज गिरी एन्ड कम्पनीको ‘छक्का पञ्जा ५’, जितु नेपाल र नीति शाह अभिनित ‘ज्वाइँ साब’ र विराज भट्टका बाबुछोराको ‘१२ गाउँ’ एकै दिन रिलिज हुन लागेका छन् । यी तीनवटै चलचित्रको चर्चा सामाजिक सञ्जालमा गुमाइरहेको छ । यसमध्ये पनि ‘छक्कापञ्जा ५’ र ‘१२ गाउँ’ बीच एकप्रकारको ‘साइबर वार’ नै चलिरहेको देख्न सकिन्छ ।

‘१२ गाउँ’ को ट्रेलर आएपछि त झन दर्शकहरुले ‘छक्कापञ्जा ५’ ले यसपटक पानी सम्म भन्न नपाउने विश्लेषण गरिरहेका छन् । सामाजिक सञ्जालको ट्रेन्ड हेर्दा ‘१२ गाउँ’ ले ‘छक्का पञ्जा’ लाई कडै टक्कर दिने देखिन्छ । दर्शकहरु १२ गाउँको समर्थनमा लागेपछि छक्कापञ्जालाई निरुत्साहित गर्ने क्रम चलिरहेको छ ।

यही माहोललाई खण्डन गर्दै नायिका पूजा शर्माले आफ्नो सामाजिक संजालमा उक्त स्टाट्स हालेकी हुन् । केही समय अघिमात्र रिलिज भएको उनी अभिनित तथा निर्मित चलचित्र ‘रावायण’ले रिलिजपूर्व सामाजिक संजालमा राम्रो हाइप बनाए तापनि रिलिजपछि भने बक्स अफिसमा चिप्लिएको थियो ।