इजरायलले राक्षसी नरसंहार गरिरहेको अमेरिकी सांसदको टिप्पणी, सहयोग रोक्न बाइडेनलाई आग्रह

काठमाडौं । अमेरिकामा राष्ट्रपति निर्वाचन चलिरहेका बेला सत्तारुढ डेमोक्रेटिक पार्टीकी सांसद तथा युएस डेमोक्रेटिक प्रतिनिधि इल्हान ओमारले इजरायली प्रधानमन्त्री बेन्जामिन नेतान्याहूलाई राक्षसको संज्ञा दिएकी छन् ।

ओमारले अस्पतालहरुमा बम पड्काएर, प्यालेस्टिनी जनतालाई जलाएर र खाद्यान्न तथा औषधी सप्लाइमा अवरोध गरी सहायताकर्मी कार्यकर्ताको समेत हत्या गर्दै नेतान्याहूले पटकपटक मानव अधिकारको हनन गरेको बताएकी छन् ।

उनले नेतान्याहूबाट भइरहेको राक्षसी नरसंहार अन्त्य हुनै पर्ने भन्दै राष्ट्रपति जो बाइडेनसमक्ष इजरायललाई बल पुग्ने सबै सहायता बन्द गर्न आग्रह गरेकी छन् । यसको शुरुआत सैनिक सहायता कटौतीबाट भएको समेत उनले बताएकी छन् ।

इजरायलले प्यालेस्टाइन, गाजा र लेबनानलगायत ठाउँमा गरेको बमबारी र हिंस्रक आक्रमणमा परेर ५० हजारभन्दा बढी निर्दोष सर्वसाधारण मारिएका छन् । मर्नेमा धेरैजसो बालबालिका र महिला छन् ।

पछिल्लो पटक इजरायलले लेबनानमा तैनाथ संयुक्त राष्ट्रसंघीय शान्ति सैनिकको क्याम्पमा समेत हमला गरेको छ । त्यसक्रममा केही सैनिक घाइते भएका छन् ।

लेबनानमा करिब ८ सय नेपाली सेना समेत शान्ति सैनिकका रुपमा कार्यरत छन् ।