गजल सङ्ग्रह ‘ रैबार टीकापुरका ’  विमोचन

 कैलाली  ।  टीकापुरमा ‘रैबार टीकापुरका’ संयुक्त गजल सङ्ग्रहको विमोचन गरिएको छ ।

 २०७९ मा टीकापुरमा सम्पन्न भएको टीकापुर साहित्य महोत्सवको गजल सन्ध्या कार्यक्रममा सहभागी १५ जना स्रष्टाहरूका ५\ ५ वटा गजल समावेश गरिएको ‘रैबार टीकापुरका’ संयुक्त गजल सङ्ग्रहमा ७५ वटा गजलहरू समावेश गरिएका छन् । साहित्यकार स्व. गगनसिंह थापाको स्मृतिमा स्थापित गगन फाउन्डेसनले उक्त सङ्ग्रह प्रकाशन गरेको हो ।

उक्त सङ्ग्रहमाथि टीकापुर बहुमुखी क्याम्पसका सहप्राध्यापक डा. धनकृष्ण उपाध्यायले साहित्यिक कार्यक्रममा वाचन गरिएका १५ स्रष्टाका गजलहरूको सङ्ग्रह नै प्रकाशित हुनु आफैमा सुन्दर पक्ष भएको बताए । कार्यक्रममा सङ्ग्रहका स्रष्टा हर्क विष्ट र विष्णुकुमारी बिसी ‘सपना’ले आफ्ना ५\५ ओटा गजलहरू वाचन गरेका थिए ।

सो विमोचन कार्यक्रममा सहभागीहरूका तर्फबाट साहित्यकारहरू मीनबहादुर थापा ‘मिलन’, आर्त अकुलीन, आनन्द विक्रम राणा, कण्ठराज गिरी, झलनाथ खनाल, भक्तराज देवकोटा, ललित विष्ट, जनकराज तिमिल्सेना, चेतराज देवकोटा, निलम चौधरी र बाबु देवकोटाले गजल तथा कविताहरू वाचन गरेका थिए ।

 गगन फाउन्डेसनको आयोजनामा भएको उक्त कार्यक्रममा प्रमुख अतिथि साहित्यकार श्रेष्ठ प्रिया पत्थरले टीकापुरको माटोले थुप्रै साहित्यकार जन्माएको बताएकी थिइन् । उनले टीकापुरलाई सृजनशील भूमिको रूपमा पहिचान बनाउनु पर्ने बताइन् ।

गगन फाउन्डेसनका संस्थापक तथा संरक्षक हिक्मत थापाको अध्यक्षतामा सम्पन्न सो कार्यक्रमको सञ्चालन पत्रकार परमानन्द पाण्डेले गरेका थिए  ।