सिंहदरबारबाट मुख्यसचिवले ‘लामखुट्टे खोजी र नष्ट’ गर्दै सुरू गरे डेंगु नियन्त्रण अभियान (भिडिओ)

काठमाडौं । प्रधानमन्त्री तथा मन्त्रिपरिषद्को कार्यालयबाट लामखुट्टेको लार्भा मार्ने विशेष कार्यक्रमको सुरुवात भएको छ ।

डेंगी नियन्त्रणका लागि सरकारले सुरु गरेको राष्ट्रव्यापी अभियान अन्तर्गत शुक्रवार मुख्यसचिव एकनारायण अर्यालले उक्त कार्यक्रमको औपचारिक रूपमा सुरु गर्दै डेंगी नियन्त्रणका लागि सरकारी तहबाट पहल सुरु गरेका हुन् ।

स्वास्थ्य तथा जनसङ्ख्या मन्त्रालयको सिफारिसमा गरिएको यो कार्यक्रमले सरकारी कार्यालय मात्र नभई देशव्यापी रूपमा डेंगी नियन्त्रणमा टेवा पुर्‍याउने अपेक्षा गरिएको मुख्यसचिव अर्यालले बताए ।

स्वास्थ्य मन्त्रालयले लामखुट्टेको प्रजनन रोक्नका लागि जमेको पानीलाई हटाउने र सरसफाइलाई प्राथमिकता दिनुपर्ने सुझाव दिँदै आएको छ । लामखुट्टेले फुल पार्ने स्थल नष्ट गर्दा डेंगीको संक्रमण घटाउने प्रयासमा सहयोग पुग्ने विश्वास मन्त्रालयले व्यक्त गरेको छ ।

यसअघि, बिहीवार बसेको मन्त्रिपरिषद् बैठकले सबै सरकारी कार्यालयमा शुक्रबार बिहान १० बजे १० मिनेटको लागि एकसाथ सरसफाइ अभियान सञ्चालन गर्ने निर्णय गरेको थियो ।

यो अभियान अन्तर्गत सरकारी कार्यालयमा रहेका ग्यारेज, प्रयोगविहीन टायर, सवारी साधन, र अन्य सामग्रीमा जमेको पानी लामखुट्टेको लार्भा उत्पादन हुने मुख्य स्रोत मानिँदै आएको छ । लामखुट्टेले फैलाउने डेंगीको प्रकोप बढ्दै गएकाले यी स्थानको सरसफाइ गर्नुपर्ने निर्णय सरकारले लिएको हो ।