प्रचण्डको नेतृत्वमा सरकारविरुद्ध मा‌ओवादीले आज काठमाडौंमा खबरदारी सभा गर्दै

काठमाडौं । नेकपा माओवादी केन्द्रले आज काठमाडौंमा जनप्रदर्शन गर्दैछ । पार्टी अध्यक्ष पुष्पकमल दाहाल ‘प्रचण्ड’को नेतृत्वमा सरकारविरुद्ध खबरदारी सभा गर्न लागेको हो ।

सरकारविरुद्धको खबरदारी सभा भृकुटीमण्डपमा हुनेछ । त्यसअघि काठमाडौं मलबाट जुलुस निकालिने छ । ११ बजेपछि काठमाडौं मलबाट सुरु भएको जुलुसको नेतृत्व अध्यक्ष प्रचण्डले गर्ने जनाइएको छ ।

माओवादी केन्द्रले विपत् व्यवस्थापनमा देखिएको सरकारको असंवेदनशीलता, गैरजिम्मेवारीपन र योजनाविहीनताका कारण बेपत्ताहरूको खोजी, राहत वितरण, घाइतेहरूको उपचार, अस्थायी आवास निर्माण लगायत पुनर्निर्माण र पुनर्स्थापनाको क्षेत्रमा देखिएका समस्या समाधान गर्न सभा गर्न लागेको जनाएको छ ।

यस्तै आफ्नो पार्टी नेतृत्वको सरकारले सुरु गरेको सुशासनको अभियानलाई कमजोर बनाउन भइरहेका षड्यन्त्र र भ्रष्टाचारजन्य गतिविधिलाई निस्तेज पार्न खबरदारी सभा गर्न लागेको जनाएको छ ।

प्रधानमन्त्री केपी शर्मा ओली नेतृत्वको सरकारले सय दिन पुगेलगत्तै प्रमुख प्रतिपक्ष दल नेकपा माओवादी केन्द्र आक्रामक रूपमा प्रस्तुत हुन लागेको हो । विपक्षी दलको तर्फबाट सरकारलाई ज्ञापनपत्र बुझाए लगत्तै माओवादीले सडक आन्दोलनको घोषणा गरेको थियो ।