न्यूजिल्यान्डका बलर स्कट कुुग्गेलेइज्न सुदूरपश्चिम रोयल्समा अनुबन्धित

काठमाडौं । नेपाल प्रिमियर लिगको फ्रेन्चाइज सुदूरपश्चिम रोयल्सले न्यूजिल्यान्डका बलिङ अलराउन्डर स्कट कुग्गेलेइज्नलाई टीममा अनुबन्धित गरेको छ । उनी सुदूरपश्चिममा आबद्ध भएका तेस्रो विदेशी खेलाडी हुन् ।

सुदूरपश्चिम रोयल्लसले कुुग्गेलेइज्नको अनुबन्धबारे जानकारी गराउँदै सामाजिक सञ्जालमा लेखेको छ, ‘स्कटले तीव्र गति, म्याच जिताउने ऊर्जा र कहिल्यै हार नमान्ने स्वभाव टीममा ल्याउने छन्, जसले हाम्रो खेललाई उकास्ने छ ।’

३२ वर्षीय स्कटले न्यूजिल्यान्डको राष्ट्रिय टिमबाट ३ टेस्ट, ३ ओडिआई र १८ टी २० म्याच खेलेका छन् । टी–२० अन्तर्राष्ट्रियमा उनले १८ म्याच खेल्दा १६ विकेट लिएका छन्, जहाँ उनको इकोनोमी ८.७४ र औसत २९.४३ रहेको छ । ब्याटिङतर्फ उनले अन्तर्राष्ट्रिय म्याचमा उल्लेख्य प्रदर्शन गरेका छैनन् ।

सुदूरपश्चिमले यसअघि स्कटल्यान्डका अलराउन्डर ब्रान्डेन म्याकमुलन र ईंग्ल्यान्डका अलराउन्डर साइफ जइबलाई खरिद गरिसकेको छ । टिमको मेन्टरमा अष्ट्रेलियन लिजेन्ड ब्राड होज रहेका छन् ।