ह्रस्वदिर्घका मेकर्सको खुलासा– ब्रम्हानन्दको रोलमा जितु नेपाललाई गरिएको थियो अफर

काठमाडौं। झण्डै २ वर्षदेखि बन्ने भनी चर्चामा रहेको चलचित्र ‘ह्रस्व दीर्घ’ अन्तत कात्तिक ३० गतेदेखि प्रदर्शनमा आउने भएको छ। अभिनेत्री नीता ढुंगानाले निर्माण गरेको चलचित्रमा नेपालीमात्र नभएर दक्षिण भारतीय कलाकारहरुको समेत अभिनय रहेको छ भने चलचित्र नेपाली र हिन्दी दुई भाषामा एकैसाथ प्रदर्शन हुने भएको छ।

चलचित्र ‘शुभलभ’ पछि अभिनय करियरबाट परै रहेका नीता पति हरिहर अधिकारीलाई यस चलचित्रमा मुख्य भुमिकामा देख्न सकिन्छ। चलचित्रमा हरिहरसँगै अभिनेत्री विपना थापा, गरिमा शर्मा, रेखा थापा, प्रशान्त ताम्राकार, सञ्चीता लुईटेल, सरोज खनाल, रवीन्द्र झाको अभिनय हेर्न पाइन्छ भने भारतबाट भारतीय कलाकारहरु ब्रह्मानन्दम, अली, सुनिल वर्मा, प्रदीप रावत, कबीर दुहन सिंहलगायतले अभिनय गरेका छन।

हालका लागि चलचित्रको मुख्य आकर्षण ब्रह्मानन्दम रहेका छन्। प्रचारप्रसारमा पनि उनको चर्चा खुबै हुने गर्दछ। चलचित्र निर्माण टिमका अनुसार ब्रह्मानन्दम चलचित्रको लागि पहिलो रोजाई थिएनन। उनको ठाउँमा निर्माण टिमले जितु नेपाललाई अप्रोच गरेका थिए। तर जितु ‘ह्यारीकी प्यारी’मा व्यस्त भएपछि उनी चलचित्र ‘ह्रस्व दीर्घ’मा जोडि सकेनन्। उनी नभ्याउने भएपछि टिमले ब्रह्मानन्दमलाई चलचित्रमा भित्र्याएको हो।

ठुलोे बजेटमा बनेको यो चलचित्रको लगानी भने टिमले अहिलेसम्म खुलाएको छैन। चलचित्रको अनुभव बारे सुनाउँदै एकैपटक अभिनय र निर्मात्री बनेकी अभिनेत्री ढुंगाना सुनाउँछिन,‘‘प्रोड्युसर मात्र बनेको भए पनि हुने रहेछ । दुई–तीनतिरको दबाब झेल्न निकै गाह्रो हुने रहेछ। हाम्रो उद्योगमा कसैले पनि सपोट गरेनन् ।’

उनले वर्षौदेखि अभिनय गर्दा सिक्न नसकेको पाठ निर्माता बनेर सिकेको बताइन् । उनले भनिन्, ‘म मार्फत दुई फिल्म उद्योगलाई जोडेर काम गर्ने वातावरण बन्यो ।’

यसै चलचित्रबाट चन्द्र पन्तले निर्देशनमा डेब्यु गरेका छन् भने अभिनेत्री बिपना थापाले १६ वर्षपछि सिने क्षेत्रमा पुनरागमन गरेकी छिन्। चलचित्रमा उनी हरिहरकी आमाको भूमिकामा छिन्।