पाँच करोडपटक हेरिएको ‘रुकुम मैकोट’ डेढ महिनादेखि ग्लोबल ट्रेण्डिङमा

काठमाडौं । चलचित्र ‘खुस्मा’को गीत ‘रुकुम मैकोट’ डेढ महिनादेखि युट्युबको ग्लोबल ट्रेण्डिङमा छ । एसडी योगी र शान्तिश्री परियारको स्वर रहेको यस गीत गत असोज ६ गतेदेखि युट्युबको ग्लोबल ट्रेण्डिङमा समावेश छ । अहिले भने ग्लोबल ट्रेण्डिङको ८६ औं स्थानमा छ ।

टिकटक र इन्स्टाग्राम, फेसबुकका रिल्सहरुमा लोकप्रिय यस गीतलाई अहिलेसम्म ५ करोडपटक हेरिएको छ । एसडी योगीकै संगीत रहेको यस गीतको शब्द सुरेन्द्र रानाले लेखेका हुन् । अशोक थापा मगरको निर्देशन रहेको ‘खुस्मा’मा धिरज मगर र उपासना सिंह ठकुरी मुख्य भूमिकामा छन् ।

‘रुकुम मैकोट’ ग्लोबल ट्रेण्डिङको ५९ औं स्थानसम्म उक्लिएको थियो । युट्युबले हरेक साता ग्लोबल टप म्युजिक भिडियोको सूचि सार्वजनिक गर्ने गर्छ । अहिले ग्लोबल ट्रेण्डिङको शीर्ष स्थानमा रोज र ब्रुनो मार्सको ‘एपीटी’ छ भने दोस्रो नम्बरमा ‘स्त्री २’को ‘आजकी रात’ छ ।