विश्वका ७० नेतासँग कुरा भो, म पुटिनसँग कुरा गर्छु : ट्रम्प

काठमाडौं । ४७ औं अमेरिकी राष्ट्रपतिमा चयन भएका डोनाल्ड ट्रम्पले आफू रुसी राष्ट्रपति भ्यादिमिर पुटिनसँग कुरा गर्ने बताएका छन् ।

अमेरिकी मिडिया एनबीसी न्यूजको समाचार साभार गरेर रुसी विश्व च्यानल आरटीले उल्लेख गरे अनुसार आफू निर्वाचित भएपछि विश्वका ७० नेतासँग कुरा भएको र पुटिनसँग भने नभएको भन्दै उनले आफू कुरा गर्न तयार भएको बताएका छन्।

रुसले ट्रम्पलाई गोप्य रूपमा चुनाव जितेकोमा बधाई दिएको पनि सार्वजनिक भएको छ । सन २०१४ मा क्राइमिया रुसमा युक्रेनबाट गाभिदा अमेरिका र रुस सम्बन्ध चिसिएको थियो भने सन २०२२ मा सुरु युक्रेन हमलाबाट त पानी बाराबारको अवस्थामा पुगेको छ ।

राष्ट्रपति जो बाइडेनले सार्वजनिक रूपमा पुटिनको पटक पटक तेजबोध मात्र होइन युक्रेनलाई खर्बौँका हतियार दिएका छन्।

ट्रम्पले आफूले कार्यालय सम्हालेपछि २४ घण्टामा युक्रेन युद्ध सकिने उद्घोष गरेका थिए । आगामी जनवरीबाट ट्रम्पले औपचारिक रूपमा सत्ता लिनेछन्।