भटाभट फिल्म साइन गर्दै माग्नेबुढा, ऋषि लामिछानेको नयाँ प्रोजेक्टमा जोडिए

काठमाडौं । चर्चित हास्यकलाकार केदार घिमिरे (माग्ने बुढा) केही समय छक्कापञ्जा बाहिरका ब्यानरमा व्यस्त हुने भएका छन् ।

अनमोल केसी अभिनित जेरी अन टपमा अनुवन्धित भएको केही समयमै उनलाई निर्देशक ऋषी लामिछानेले आफ्नो नयाँ प्रोजेक्टमा भित्र्याएका छन् ।

माग्नेबुढा र ऋषीबीच बिहीबार कागजी सम्झौता भएको हो । चलचित्रको नाम भने सार्वजनिक गरिएको छैन । चलचित्रमा माग्नेबुढाको महत्वपूर्ण भूमिका रहने बताइएको छ । चलचित्रको निर्माता मुनाल घिमिरे रहेका छन् । अन्य कलाकारहरुको खोजी भइरहेको छ ।

चलचित्रमा हाइ डिमान्ड भए तापनि माग्ने बुढाले छक्कापञ्जा ब्यानरबाहिर काम गर्न आनाकानी गर्दै आएका थिए । तर, अहिले उनले ब्याक टु ब्याक दुई फिल्म साइन गरेका छन् । यसबाट छक्कापञ्जा ब्यानरले उनलाई स्वतन्त्र छोडिदिएको बुझ्न सकिन्छ ।