स्व. सुनिल बर्देवाप्रति समर्पित राजु लामा र द एन्जल्स ब्यान्डको नयाँ गीत ‘कति छन्’ सार्वजनिक

काठमाडौं। द एन्जल्स ब्यान्डले ‘कति छन्’ शीर्षकको नयाँ गीत सार्वजनिक गरेको छ । यस गीतमा ब्यान्डका प्रमुख गायक राजु लामाले स्वर दिएका छन् ।

यस गीतको संगीत र शब्द स्व. सुनिल बर्देवाले तयार पारेका थिए । गीतको भिडियोमा द एन्जल्स ब्यान्डका सदस्यहरूको प्रस्तुति रहेको छ, जसमा गायक राजु लामासँगै राजेश, विकास र ताशी रहेका छन् ।

यो गीत आरएल डिजिटल रेकर्डिङ स्टुडियो बाल्टिमोर अमेरिकामा रेकर्ड गरिएको हो । भिडियो पनि अमेरिकामै तयार पारिएको हो । भिडियोको निर्देशन र छायांकन संगमले गरेका छन् । ग्राफिक्सको काम बालकृष्ण श्रेष्ठले गरेका छन् । गायक लामाले भिडियोको अवधारणा तयार पारेका हुन् ।

यो गीत स्वर्गीय सुनिल बर्देवा (गुरु बा)लाई श्रद्धाञ्जलीस्वरूप समर्पित गरिएको गायक लामाले बताए ।

बर्देवा नेपाली पप संगीतका चर्चित गायक, गीतकार, संगीत संयोजक र गितारवादक थिए, जसले गितारमा विशेष दक्षता हासिल गरेका थिए । उनका ‘गोरटो अनि उस्तै छ गली’ र ‘बिहानीमा’ जस्ता गीतहरू विशेष चर्चित छन् । बर्देवाको सन् २०१६ मा ४४ वर्षको उमेरमा निधन भएको थियो ।