पूर्णबहादुरको सारंगीले दर्शक कब्जा गरेपछि ‘केटी हराएको सूचना’ को रिलिज स्थगित

काठमाडौं । आउँदो कात्तिक ३० गते रिलिज हुने भनिएको चलचित्र ‘मिसिङः केटी हराएको सूचना’ को प्रर्दशन स्थगित गरिएको छ । देशभरका हलहरुमा ‘पूर्णबहादुरको सारंगी’ ले बलियो प्रभूत्व जमाएको हुँदा सो चलचित्र स्थगित गर्ने निर्णय निर्माण टिमले लिएको हो ।

ट्राइसिटी पिक्चर्सले निकालेको सूचनामा पूर्णबहादुरले दर्शकबाट पाइरहेको मायाप्रति सद्भाव व्यक्त गरिएको छ ।

‘जुन तरिकाले पूर्णबहादुरको सारंगीले दर्शकको साथ पाएको छ, यो अवस्थामा नयाँ चलचित्र आउँदा चलचित्र घरहरुले नयाँ चलचित्रलाई समेत शो बाँडफाँड गर्नुपर्ने अवस्थाको सिर्जना हुने हुँदा दर्शकको साथ प्राप्त चलचित्र समेतलाई असर पर्ने सम्भावना रहने भएकाले इतिहास कायम गर्ने बाटोमा रहेको चलचित्रलाई सहज बनाइदिनु हाम्रो दायित्व हो भन्ने मान्यता कायम राख्दै केटी हराएको सूचनाको प्रदर्शन हाललाई स्थगित गरिएको जानकारी गराउन चाहन्छौं’, सूचनामा भनिएको छ ।

प्रदर्शनको अर्को मिति सार्वजनिक गरिने सूचनामा जनाइएको छ ।