रुकुम पूर्वकाे पुथा उत्तरगंगामा एमालेपछि माओवादीले टुंगो लगायो उम्मेदवार

रुपन्देही । रुकुम पूर्व जिल्लाको पुथा उत्तरगङ्गा गाउँपालिका उपाध्यक्षमा एमाले र माओवादीले उम्मेदवारको टुंगो लगाएका छन् । मंसिर १६ गते हुने स्थानीय तहको उपनिर्वाचनका लागि मंसिर २ गते उम्मेदवार मनोनयन गर्नुपर्ने समय तालिका रहेको छ ।

माओवादी रुकुम जिल्ला संयोजक कुमारी बरालले माओवादी केन्द्रबाट ज्ञानदेवी पुनलाई उम्मेदवार बनाउने निर्णय भएको जानकारी दिएकी छन् । यहाँ यसअघि पनि माओवादीले नै जितेको थियो ।

पुथा उत्तरगंगामा यसअघि एमालेले केशकुमारी तुलाधरलाई उम्मेदवार बनाउने निर्णय गरिसकेको छ । नेपाली कांग्रेस भने अझै टुङ्गो लगाउन सकेको छैन ।

नेपाली कांग्रेसका जिल्ला उपसभापति भीमबहादुर खड्काले यही सोमबारभित्र उम्मेदवारको टुङ्गो लगाउने जानकारी दिए । कांग्रेसबाट सो पदका लागि ५ जनाको नाम छलफलमा रहेको छ । कांग्रेस नेताहरुका अनुसार नन्दबहादुर सुनुवार, जयबहादुर बुढा, कमला मल्ल, रविना घर्ती र सूर्यकुमारी बुढामध्येबाट एक जनाको नाम टुंगो लाग्नेछ ।

यस्तै सोही गाउँपालिकाको २ नम्बर वडाध्यक्षमा माओवादी केन्द्रले जगत घर्तीमगर र एमालेले जीवन रोकामगरलाई उम्मेदवार बनाउने भएका छन् । कांग्रेसबाट सो वडामा कमाई बुढा र कर्णबहादुर बुढामध्ये एक जनाको टुंगो लाग्नसक्ने जनाइएको छ ।

रुकुम पूर्वको पुथा उत्तरगंगा गाउँपालिका उपाध्यक्ष भूपेन्द्रा बुढाको निधनपछि यहाँ उपनिर्वाचन हुन लागेको हो । माओवादी केन्द्रकी बुढा ४ हजार ५९ मत पाएर निर्वाचित भएकी थिइन् । उनका निकटम प्रतिस्पर्धी कांग्रेसका कमलाकुमारी मल्लले २ हजार १० मत र एमालेका धर्म घर्ती बुढाले १ हजार ८१२ मत पाएका थिए ।

अहिले यहाँ तीनै दलको अस्तित्वको लडाइँ हुने देखिएको छ । कांग्रेस-एमाले गठबन्धन गरेर जाने तयारी गरे पनि कुनै निचोडमा पुगेका छैनन् । माओवादीको मत धेरै रहेको पालिका भएकाले कांग्रेस-एमालेले गठबन्धन गरेर जाने गरी छलफल चलाएका छन् ।

सोही गाउँपालिकाको वडा नम्बर २ अध्यक्षको मृत्युपछि उपनिर्वाचन हुँदैछ । गत निर्वाचनमा माओवादी केन्द्रका जसबहादुर श्रीपाली २३४ मत पाएर यो वडाको अध्यक्षमा निर्वाचित भएका थिए । उनका प्रतिस्पर्धी कांग्रेसका कर्णबहादुर बुढाले १७९ मत पाएका थिए ।

पालिका उपाध्यक्ष र वडाध्यक्षको गत भदौ महिनामा बाग्लुङमा दुर्घटनामा परेर मृत्यु भएको थियो । लुम्बिनीको रुकुमपूर्वबाहेक अन्य ४ वडाध्यक्षसहित ६ रिक्त स्थानमा उपनिर्वाचन हुँदैछ ।