मकवानपुरका प्रअमाथि सिन्धुलीमा गोली प्रहार

हेटौंडा । पूर्वी मकवानपुरको बकैया गाउँपालिका वडा नम्बर –३ स्थित बुद्ध मावीका प्रधानाध्यापकमाथि गोली प्रहार भएको छ ।

मकवानपुरबाट सिन्धुलीतर्फ जाने क्रममा हरिहरपुरगढी गाउँपालिका–६ स्थित हप्सेमा प्रअ प्रेमबहादुर बोम्जनमाथि गोली प्रहार भएको हो ।

गोली लागेर घाइते बोम्जमको अहिले वीरगन्जको वयोधा अस्पतालमा उपचार भईरहेको जिल्ला प्रहरी कार्यालय सिन्धुलीले जनाएको छ ।

गोली प्रहारबाट मोटरसाइकल चलाइरहेका बोम्जनले प्रयोग गरेको हेलमेटको दायाँ तर्फबाट गाला छेडिएको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए ।

गोली बोम्जनको दाँतमा अड्किएको उनको उनको भनाइ छ । गोली प्रहारबाट घाइते भएका बोम्जनको सर्लाहीस्थित मोडल अस्पतालमा सामान्य उपचार पश्चात् थप उपचारका लागि वीरगन्जको वयोधा अस्पताल पठाइएको प्रहरीको भनाई छ । नेपाल प्रेससङ्ग कुरा गर्दै एसपी काफ्लेले फरार रहेकाहरुको खोजीकार्य तीव्र गतिमा भैरहेको बताए ।

तराई मूलका जस्ता देखिने ३ जना अपरिचित व्यक्तिले मकवानपुरबाट प्रदेश २–००३–००६ प ८४५४ नम्बरको मोटरसाइकलमा सिन्धुलीतर्फ जाँदै गरेको अवस्थामा बोम्जनमाथि गोली प्रहार गरेर भागेका हुन ।

उनका अनुसार ३ जनाको समूहमा आएका व्यक्तिले मोटरसाइकलमा सवार उनलाई रोकी छोटो हतियार (कट्टा) प्रहार गरेका थिए ।