रविलाई भेट्न पोखरा पुगे दीपकराज, यस्तो छ ३० वर्ष पुरानो अन्तरसम्बन्धको ‘राज’

काठमाडौं । चलचित्र निर्माता तथा अभिनेता दीपकराज गिरीले आज पोखरा पुगेर प्रहरी हिरासतमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेलाई भेटे । काठमाडौंदेखि धाएर रविलाई भेट्न पोखरा पुग्नुमा उनीप्रतिको सहानुभूतिमात्र नभएर ३० वर्ष लामो व्यक्तिगत सम्बन्धको पृष्ठभूमि रहेको छ ।

अर्का कलाकार निर्मल शर्मालाई साथ लिएर दीपकराज हिजो जिल्ला प्रहरी कार्यालय कास्की पुगेका थिए । हिजै राति भेट्न प्रयास गरे पनि अनुमति नमिलेपछि आज बिहान भेटेको दीपकराजले बताए । भेटमा आफूले रविलाई पहिलेकै जस्तो आत्मविश्वासले भरिपूर्ण देखेको उनको भनाइ छ ।

‘उहाँको अनुहारमा कुनै पनि विरक्ति वा निराशाको भाव थिएन’, उनले भने, ‘तर नेपालमा प्रतिशोधको राजनीति सुरु भयो भन्ने कुराले अलिकति चिन्तित देखिनुहुन्थ्यो ।’

हिरासत बसाइका विषयमा रविले कुनै पनि गुनासो नगरेको दीपकराजले बताए ।

उनले भने, ‘प्रहरीको व्यवहारप्रति उहाँको कुनै पनि गुनासो छैन । गुनासो र आक्रोश केवल सरकारप्रति छ ।’

०००

निरन्तर कलाकारितामा रमाइरहेका दीपकराज र पत्रकारिता हुँदै राजनीतिमा फड्को हानेका रवि लामिछाने कुनै बेला एउटै डुंगामा सयर गर्थे । २०५० सालतिरै उनीहरुको मित्रता टुसाएको थियो ।

उनीहरुको पहिलो भेट र चिनाजानी रेडियो नेपालको क्यान्टिनमा भएको थियो । त्यसबेला दीपकराज रेडियोमा र रवि टेलिभिजनमा करिअर बनाउने चक्करमा थिए । उनीहरुको प्रतिभा पनि फरक-फरक थियो । दीपकराज अभिनयमा पोख्त, रवि उद्घोषणमा पारंगत । पछि उनीहरुसँगै जोडिन आइपुगे गायक रामकृष्ण ढकाल । सुमधुर गला पनि थपिएपछि एउटा त्रिवेणीको रचना भयो ।

दीपकराज, रवि र रामकृष्णको त्रिवेणी राम्रै चम्किरहेको थियो । उनीहरु धेरै कार्यक्रमहरुमा सँगै हिँडे । स्टेज कार्यक्रममा रवि उद्घोषण गर्थे, रामकृष्ण गीत गाउँथे र दीपकराज हँसाउथे, तर रवि अमेरिका हानिएपछि यो सिलसिला भंग भयो ।

कलाकारितालाई माया मार्दै रवि लामो समय अमेरिकामा बसे । दीपकराज भने कलाकारितामै दही जस्तो जमिरहे । दुरी बढेसँगै सम्बन्ध र सम्पर्क पनि पातलियो । एक पटक आफू अमेरिका जाँदा रविसँग भेट भएको र गाह्रोसाह्रो परेको बेला उनले सघाएको दीपकराज बताउँछन् ।

रवि अमेरिकाबाट फर्किएपछि उनीहरुको दोस्ती फेरि बौरियो । हरेक पटक रवि समस्यामा पर्दा दीपकराजले साथ र समर्थन व्यक्त गरेका छन् । सालिकराम पुडासैनीको आत्महत्या प्रकरणमा रवि पक्राउ पर्दा पनि दीपकराज उनलाई भेट्न चितवन पुगेका थिए ।

रविले सुरु गरेको ग्यालेक्सी फोरके टीभीमा केही समय दीपकराजले पनि काम गरे । उनी ‘क्राइम पेट्रोल’ नामक कार्यक्रम चलाउँथे, तर धेरै समय त्यसमा टिकेनन् ।

रवि राजनीतिमा फड्किएपछि पनि सम्बन्ध सुमधुर नै रह्यो । रविले दीपकराजलाई पनि राजनीतिमा तान्न खोजेका थिए, तर उनी तानिएनन् ।

गत संसदीय चुनावमा रविले आफूलाई काठमाडौं ९ बाट रास्वपा उम्मेदवार बन्न अफरसमेत गरेको दीपकराजको भनाइ छ ।

‘हो, उहाँले मलाई आफ्नै क्षेत्रबाट चुनाव लड्न आग्रह गर्नुभएको थियो । म झण्डै हाम्फाल्न खोजेको पनि थिएँ, तर रोकिएँ’, उनले भने ।

राजनीतिभन्दा कलाकारिताबाटै देशका लागि योगदान दिनसक्छु भनेर राजनीतिमा हाम्फाल्न नचाहेको उनी बताउँछन् ।

दीपकराज एउटा सफल कलाकार भएकाले मात्र होइन, उनले राजनीति बुझेको र राजनीतिको अनुभव पनि भएको हुँदा रविले उनलाई चुनाव लड्न प्रस्ताव गरेका थिए ।

उनी आफ्नो राजनीतिक अनुभव सुनाउँदै भन्छन्, ‘मैले पञ्चायतकालमै राजनीति गर्न थालेको हुँ, जतिबेला म स्कुल पढ्थें । २०४६ सालको आन्दोलनमा म प्रहरीको खोजी सूचीमै थिएँ । प्रजातन्त्र आएपछि विद्यार्थी राजनीतिमा लागें । एउटा पार्टीको विद्यार्थी संगठनको जिल्ला कमिटीमा थिएँ । कलेजमा राजनीतिशास्त्र नै पढें, तर विस्तारै राजनीतिप्रति वितृष्णा उब्जिन थाल्यो । राजनीतिमा लाग्दा म भीडमा हराउँछु भन्ने महसुस भयो । २०५२ सालपछि राजनीतिबाट सन्न्यास लिएर पूर्ण रुपले कलाकारितामा केन्द्रित भएँ । अहिले मेरो कुनै पनि दलमा राजनीतिक आवद्धता छैन ।’

विगतमा कुन पार्टीबाट राजनीति गरेका थिए भन्ने उनले खुलाउन चाहेनन् ।

०००

रवि यतिबेला सहकारी ठगीको आरोप झेलिरहेका छन् । यही आरोपमा उनी पक्राउ परेर हिरासत राखिएका हुन् । के दीपकराजलाई लाग्छ कि रविले सहकारी ठगी गरेकै हुन् ?

उनी भन्छन्, ‘एस र नो’ मा त म जवाफ दिन सक्दिनँ, तर भविष्यमा देशको प्रधानमन्त्री नै बन्छु भन्ने महत्वाकांक्षा लिएको व्यक्तिले यति कच्चा खेल खेल्नुहोला जस्तो लाग्दैन ।’

रविसँग उनको अहिले एउटा चित्त दुःखाइ भने छ ।

‘एउटा कुरामा मेरो मतभिन्नता रह्यो’, दीपकराज भन्छन्, ‘म रास्वपा अहिले सरकारमा नजाओस् भन्ने पक्षमा थिएँ । अहिले सशक्त प्रतिपक्षको रुपमा संसदमा प्रभावशाली भूमिका निभाउनुस्, लोकप्रियता बढाउनुस्, शक्ति सञ्चय गर्नुस् र अर्को चुनावपछि अझ बलियो भएर सत्तामा जानुस् भन्ने सुझाव दिँदै आएको हुँ, तर उहाँहरु अलिकति हतारिनुभयो । त्यसैको परिणति आज यो घटना भएको हो जस्तो लाग्छ ।’

रवि दुई पटक गृहमन्त्री हुँदा आफू भेट्न नगएको उनी बताउँछन् ।

‘हो, उहाँले सिंहदरवारमा र निवासमा भेट्न बोलाउँदा पनि म गइनँ । पछि सरकारबाट हटेपछि चाहिँ भेटें’, दीपकराजले भने ।

आज हिरासतमा भएको भेटमा पनि आफूले रविलाई यो कुरा सम्झाएको दीपकराजले बताए ।

‘हामीबीच खुलस्त कुराकानी भएको थियो । सत्तामा जानु नै तपाईंहरुको ठूलो कमजोरी भयो भनेर मैले प्रस्टसँग राखें’, उनले भने ।

दीपकराजको आँखामा रविका कमजोरी के हुन् ?

‘हिजो पत्रकारिता गर्दाखेरि स्वच्छन्द रुपमा बोल्नुहुन्थ्यो, सबैलाई प्रश्न गर्नुहुन्थ्यो । नेता भएपछि हिजो बोलेका कुराहरुले लखेटिरहेका छन् । अरुलाई सोधेका प्रश्न आफैंतिर फर्किएका छन् । अहिले जवाफ दिने भूमिकामा हुनुहुन्छ, तर प्रश्नहरु सजिला छैनन्’, उनी भन्छन् ।