‘ज्वाइँ साब’ पछि ‘कार्साङ्’मा जितु नेपाल, क्यारेक्टर लुक्स सार्वजनिक

काठमाडौं । ‘ज्वाइँ साब’ पछि कलाकार जितु नेपाल चलचित्र ‘कार्साङ्’ मा देखिने भएका छन्। ‘कार्साङ’ बाट उनको क्यारेक्ट लुक्स सार्वजनिक भएको छ । निर्माणपक्षले आज जितुको क्यारेक्टर लुक्स सार्वजनिक गरेको हो ।

पोस्टरमा जितुले कालो टोपी, चेक सर्ट, स्टकोट, कालो पाइन्ट र लेकमा लगाउने गमबुट लगाएका छन् भने उनले घुँडामा झोला अड्याएका छन् र हातमा कचौरो बोकेका छन् । पृष्ठभूमिमा रहेका घर, पहाड, कुहिरो हेर्दा उनी कुनै लेकाली गाउँका स्थानीय हुन् झैँ देखिन्छ ।

पोस्टरमा ‘मकै त पिन्ने घट्टामा, पिरती बस्यो ठट्टामा’ लेखिएको छ । पोस्टरको यो स्टेटमेन्टले उनी कसैको प्रेममा परेका हुन् कि भन्ने अनुमान लगाउन सकिन्छ । यसअघि दयाहाङ राईको क्यारेक्टर लुक्स सार्वजनिक गरेको ‘कार्साङ’ले बिस्तारै प्रचार सुरु गरेको छ ।

यम शेर्पाको डेव्यु लेखन तथा निर्देशनमा निर्माण भएको चलचित्र ‘कार्साङ’ पुस २६ गते बाट प्रदर्शन हुँदैछ । शेर्पा समुदायको संस्कृतिमा आधारित भएर बनेको यो चलचित्रमा अभिनेता दयाहाङ राई, डेब्यु अभिनेत्री सिर्जना निङलेखु, जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन, सुरवीर पण्डितलगायतको अभिनय छ ।

यार्सा फिल्म्स र पुरुषोत्तम प्रधान फिल्म्सको प्रस्तुतिमा निर्माण भएको चलचित्रमा पुरुषोत्तम प्रधानको छायांकान र निर्माण छ । चलचित्रको सह–निर्मातामा गोविन्द बोहरा, कार्यकारी निर्माता आङछिरिङ शेर्पा तथा लाइन प्रोड्युसर वीरेन्द्र शाही छन् ।

यो चलचित्रको अन्तर्राष्ट्रिय वितरण अधिकार हुल्या इभेन्टसका सुमन पराजुली र सोमलाल थोकरले लिएका छन् भने देशभर वितरणको जिम्मेवारी आरआर फिल्म्स्ले लिएको छ ।