हामी फरक स्वाद लिएर आएका छौं, ‘पूर्णबहादुरको सारंगी’ ले असर गर्दैनः हरिहर अधिकारी

काठमाडौं । आउँदो शुक्रबारबाट नीता ढुंगाना र हरिहर अधिकारी स्टारर चलचित्र ‘हृश्व दीर्घ’ प्रदर्शन हुँदैछ । चलचित्रमा ढुंगाना र अधिकारीको अलवा साउथ कलाकारहरू ब्रह्मानन्दन, प्रदीप रावत, सुनील बर्मा, मोहम्द अली छन् । नेपाली कलाकार विपना थापा, रेखा थापा पनि चलचित्रमा छन् ।

चलचित्रको ट्रेलर, टिजरले दर्शकको राम्रो प्रतिक्रिया पनि पाइरहेको छ । केही हलहरूले बुकिङ पनि खुल्लाइसकेका छन् । फाट्टफुट्ट बुकिङहरू भइरहेको देखिन्छ पनि । तर, ६ करोड लगानीमा बनेको फिल्मलाई यति मात्रै बुकिङ काफी देखिँदैन । यदि बक्स अफिसबाटै लगानी उठाउने हो भने फिल्मले १५ करोडमाथिको ग्रस कलेक्सन गर्नुपर्छ ।

‘हृश्व दीर्घ’लाई अहिले मुख्य चुनौती भनेको हलहरूमा दर्शकको सुनामी ल्याइरहेको ‘पूर्णबहादुरको सारंगी’ हो । कात्तिक १५ गतेदेखि प्रदर्शनमा आएको यस चलचित्रले रोकिने छाँट देखाएको छैन । बक्स अफिसमा नयाँ नयाँ रेकर्ड बनाइरहेको छ । नेपाली चलचित्रको इतिहासकै सबैभन्दा बढी ग्रस कलेक्सन गर्ने छाँट देखाइरहेको छ । यही चलचित्रले भारतीय चलचित्रहरूलाई पनि पाखा लगाइदियो ।

‘पूर्णबहादुरको सारंगी’कै कारण ‘हश्व दीर्घ’ सँगै प्रर्दर्शनमा आउन लागेको चलचित्र ‘मिसिङ : केटी हराएको सूचना’ पछि धकेलियो । यिनै विषयलाई लिएर हरिहर अधिकारीसँग गरिएको संक्षिप्त कुराकानी-

-अहिले ‘पूर्णबहादुरको सारंगी’ले रोकिने छाँट देखाइरहेको छैन । यो तपाईंहरूका लागि चुनौती हो कि होइन ?

यसरी बक्स अफिस चलायमान हुनु राम्रो हो नि ! नेपाली चलचित्रलाई दर्शकहरूले हेरिदिनु, माया गरिदिनु राम्रो हो । त्यसैले ‘पूर्णबहादुरको सारंगी’लाई लिएर हामीले चुनौती महसुस गरेका छैनौं । धेरै दर्शकहरूले यो फिल्म हेरिसक्नुभयो । उहाँहरूले हाम्रो चलचित्रको ट्रेलरलाई हलमा बजाउँदा राम्रो रेसपोन्स गरिरहनुभएको छ । राम्रो प्रतिक्रिया दिनुभएको छ । त्यसैले यो चलचित्र हाम्रा लागि चुनौती होइन ।

-‘पूर्णबहादुरको सारंगी’को क्रेज घटिरहेकै छैन । यसले तपाईँहरूको चलचित्रको व्यापारलाई असर त गर्ला नि !

हामीले ‘पूर्णबहादुरको सारंगी’ ले असर गर्ला भनेर सोचेकै छैनौं । हामीले थोरै शो पाएका छौं, त्यसको कारण बुझ्छौं । तर, त्यही शो दर्शकले हेरिदिनुभयो भने बिस्तारै शो बढ्छ भनेर अपेक्षित छौं । हल सञ्चालकहरूले दुवै फिल्मलाई राम्रोसँग म्यानेज गरिदिनुहुन्छ भन्ने लागेको छ ।

हाम्रो चलचित्र दर्शकका लागि नयाँ स्वाद हो । यहाँ कमेडी छ, एक्सन छ, इमोसन छ । हामीले दर्शकलाई फरक स्वाद दिन चाहेका हौं । हाम्रा चलचित्र हेरिदिएपछि उहाँहरूले जे प्रतिक्रिया दिनुहुन्छ, त्यसलाई सहर्ष स्वीकार गर्छौं । उहाँहरूले मन पराउनुभयो भने चलचित्र अगाडि जाला, मन पराउनुभएन भने चलचित्र नचल्ला । आउँदो शुक्रबारबाट हाम्रो हातमा केही छैन, जे छ दर्शकको हातमा छ ।

– महँगा विदेशी कलाकार राखेर चलचित्र बनाउँदा लगानी ठूलै भएको देखिन्छ । लगानी उठ्ला त ?

हाम्रो लगानी पाँच, छ करोड आसपासमा छ । पहिला पनि नेपाली चलचित्र चार, साढे चार करोडमा बनेकै हुन् । हाम्रो डेढ दुई करोड अलि ज्यादा भएको हो । चलचित्रको लगानी उठाउने कुरा त डिजिटल प्ल्याटफर्म, ओटीटी, हिन्दी भाषाको रिलिजलगायत पनि भयो । यी कारणले हामी सुरक्षित हुन्छौं ।

– नेपाली बक्स अफिसबाटै लगानी उठाउन सक्छ त ?

यसमा हामी आत्मविस्वासी छौं । नीता र म निर्माणको क्षेत्रमा नयाँ हौं । तर, पहिलैदेखि चलचित्र खेलेकाले उसले उद्योग बुझेकी छ । मैलेभन्दा धेरै दर्शकको मनोविज्ञान बुझेकी छ । उसलाई आत्मविस्वास छ । एउटी नारीको आत्मविस्वासलाई सपोर्ट गरेर लगानी गरिएको चलचित्र हो । जी मुभीले पनि हाम्रो चलचित्र किन्ने भनिरहनुभएको छ । चलचित्रमा हामीले मिहेनत गरेका छौं । बाँकी दर्शकको हात भयो ।

– तपाईं त ज्योतिष, ज्योतिष विज्ञानले चाहिँ के भन्छ ?

अहिले यो शास्त्रलाई मान्छेहरूले अर्कै बनाइदिएको छ । शास्त्रले राम्रो दिनमा कामको सुरुवात गर्‍यौं भने त्यो काम सफल हुन्छ भन्छ । हामीले राम्रो दिनमा चलचित्रको सुरुवात गर्‍यौं । चलचित्र निर्माण गर्न दुई वर्ष लाग्यो । साउथ इण्डियन कलाकारलाई कन्भिन्स गर्न, नेपाल ल्याउन, भारतबाट क्यामेरा ल्याएर खिच्न धेरै नै गाह्रो थियो । तर, राम्रो दिनमा चलचित्रको सुरूवात भएको छ, राम्रै हुन्छ ।

जितु नेपालले नभ्याउने भएपछि उसको ठाउँमा ब्रह्मानन्दनलाई ल्यायौं । धेरैले यो चलचित्र बन्दैन होला भनेका थिए । बीचमा रोकिन्छ होला भनेर शंका गरेका थिए । तर, हामी सफल भयौं । ज्योतिषशास्त्र यहीँ काम लाग्यो ।

– यो चलचित्रको भविष्यबारे ज्योतिषशास्त्रले चाहिँ के भन्छ ?

यो क्षेत्रमा म ११/१२ वर्षदेखि काम गरिरहेको छु । मैले के बुझेको छु भने राजनीतिको चाहिँ भविष्यवाणी गर्न सकिँदैन रहेछ । १० जना उम्मेदवार भिड्दा कि त १० जनाकै कुण्डली चाहियो । नत्र एकजनाको कुण्डली हेरेर भन्न सकिँदैन । एमबीबीएसमा नाम निस्कन्छ कि निस्कँदैन भनेर मकहाँ मान्छेहरू आउँछन् । तर, उसको कुण्डली राम्रो भए पनि ऊभन्दा राम्रो कुण्डली भएकाहरूले त्यस दिन जाँच दिइरहेका हुनसक्छन् ।

त्यसैले यसमा लकले पनि काम गर्दोरहेछ । नीता कतिको लक्की रहिछे, म कतिको लक्की रहेछु, त्यो चलचित्र प्रदर्शन भएपछि नै थाहा होला । चलचित्रको पनि सबै टीमको कुण्डली मैले हेरेको छुइनँ । त्यसैले मनलाग्दी भविष्यवाणी गर्न मिल्दैन ।

– ‘पूर्णबहादुरको सारंगी’को क्रेज नघटिरहेको अवस्थामा तपाईँको फिल्मको व्यापारलाई त असर गर्ला नि !

दर्शकलाई मन परेमा चारवटै चलचित्र पनि चलिदिन्छ । दर्शकलाई मन परेन भने सोलो रिलिज हुँदा पनि चलचित्र चलिदिँदैन । दशैँमा ‘१२ गाउँ’ पनि चल्यो, ‘छक्का पन्जा ५’ पनि चल्यो । बजार त रहेछ नि ! त्यही बजारमा हामी जाँदैछौं । त्यसैले दर्शकलाई मन चाहिँ पर्नुपर्‍यो ।

-‘हृश्व दीर्घ’चल्ने आत्मविस्वास चाहिँ कतिको छ ?

हाम्रो चलचित्रको हिरो नै कथा हो । पुष्पाको भिलेनले हाम्रो फिल्म खेलिदिनुको कारण नै कथा मन पराएर हो । कथाले सबैलाई कन्भिन्स गरेको छ । अब दर्शकले पनि हेरिदिनुभयो भने यो चलचित्र चल्छ । पहिलो र दोस्रो दिन राम्रोसँग चल्यो भने चलचित्रले पिकअप लिन्छ ।