भक्तपुरमा आफ्नै घरमा खुट्टा बाँधिएकाे अवस्थामा वृद्धाको शव भेटियो

काठमाडौं । भक्तपुरमा खुट्टा बाँधिएको अवस्थामा महिला शव भेटिएको छ ।

बुधबार बेलुकी सवा ५ बजे भक्तपुर नगरपालिका–३ स्थित दरवारस्क्वायर इछुगल्लीमा बस्ने ९४ वर्षीया विष्णु कुमारी त्वयनाको शव खुट्टा बाँधिएको अवस्थामा भेटिएको हो ।

उनको शव आफू सुत्ने कोठामा कपडाले दुबै खुट्टा एकै ठाँउमा बाँधिएको अवस्थामा फेला परेको भक्तपुरका प्रहरी प्रवक्ता ढुण्डीराज न्यौपानेले बताए । उनी आफ्नै घरको चौथो तल्लामा एक्लै बस्दै आएकी थिइन् ।

घटनास्थलमा जिल्ला प्रहरी परिसर भक्तपुरबाट अनुसन्धान अधिकृत सहितको प्रहरी टोली, केनाईबाट कुकुर सहितको प्रहरी टोली र अपराध शाखा भक्तपुरबाट खटिएको संयुक्त प्रहरी टोलीले प्रारम्भिक अनुसन्धान कार्य गरी शव पोष्टमार्टमको लागि काठमाडौं मेडिकल कलेज दुवाकोट, भक्तपुरमा पठाइएको उनले बताए ।

घटनाको थप अनुसन्धान भइरहेको छ ।