‘पूर्णबहादुर’ को कब्जाबाट कति शो फुत्कायो ‘ह्रस्व दिर्घ’ ले ?

काठमाडौं । आउँदो कात्तिक ३० गते शुक्रबारबाट रिलिज हुन लागेको चलचित्र ‘ह्रस्व दीर्घ’ को यतिबेला अनलाइन बुकिङ खुलिसकेको छ । देशभरका फिल्म हलहरुले यो चलचित्रको अग्रिम टिकट बिक्री थालेका छन् ।

चलचित्र ‘पूर्णबहादुरको सारगीं’ ले बक्स अफिसमा सुनामी ल्याईरहेको बेलामा ‘ह्रस्व दीर्घ’ले देशभरबाट कति शो प्राप्त गर्‍याे त ? बिहीबारको तथ्यांकअनुसार निर्देशक चन्द्र पन्त निर्देशित चलचित्र ‘ह्रस्व दीर्घ’ले देशभरबाट १२८ शो पाएको छ ।

चलचित्रको हाइप र बजेट अनुसार प्राप्त शो संख्या पर्याप्त होइन । तर, पूर्णबहादुरको सारंगीमा दर्शकको उछाल रहेका बेला हलहरुले ह्रस्व दिर्घलाई धेरै शो छुट्याउन सक्ने अवस्था पनि थिएन ।

चलचित्रलाई देशकै ठुलो मल्टिप्लेक्स चेन क्यूएफएक्सले देशभरबाट ४६ शो दिएको छ । यस्तै, वान सिनेमाजले ९ शो, एफ. क्युबले ५ शो, बिग मुभिजले ६ शो र इनि सिनेमाजले ८ शो दिएका छन् । हालसम्म चलचित्रको बुकिङ मध्यम छ ।

यदि पहिलो दिनमा दर्शकको चाप देखिए पक्कै पनि हलहरुले शो थप्न सक्छन् । तर, ओपनिङ गतिलो भएन भने अहिले पाएको शो पनि गुमाउनुपर्ने अवस्था छ । चलचित्रको ट्रेलर र गीतहरुले राम्रो चर्चा पाइरहेकाले निर्माण पक्षले राम्रो ओपनिङको आशा राखेको छ । दक्षिण भारतका चर्चित कलाकारहरु भएकाले पनि यो चलचित्रप्रति दर्शकको चासो देखिन्छ ।

‘ह्रस्व दीर्घ’ मा नेपाली कलाकाहररु नीता ढुंगाना, हरिहर अधिकारी, विपना थापा, प्रशान्त ताम्राकार, सञ्चीता लुईटेल, सरोज खनाल, नरेन खड्का, गरिमा शर्मा, रवीन्द्र झा, आदर्श मिश्र, बुद्धि तामाङ र किरण केसीलगायतका कलाकारको अभिनय छ ।

दक्षिण भारतीय कलाकार ब्रह्मानन्दम, प्रदीप रावत र सुनिल बर्मा पनि पर्दामा देखिने छन् । नीता फिल्मस्को प्रस्तुतिमा निर्माण भएको चलचित्रमा हरिहर अधिकारीको कथा र प्रतीक पौडेल, निर्देशक पन्त र हरिहरको पटकथा तथा संवाद छ ।

चलचित्रका कार्यकारी निर्माता धनन्जय गलानी हुन् भने चलचित्रलाई बलिउडका चर्चित सिनेमाटोग्राफर कवीरलालले खिचेका छन् । नीताकै लगानी रहेको यो चलचित्र नेपाली, तेलुगु र हिन्दी गरी तीन भाषामा रिलिज हुनेछ । चलचित्रलाई मनोज राठी र उज्ज्वल पौडेलको व्याङ्कटेस इन्टरटेनमेन्ट वितरण गर्दैछ ।