राफिन्हालाई १० नम्बर जर्सी

काठमाडाैं । विश्व फुटबलमा प्रख्यात खेलाडी अझ स्टार फर्वाडले प्रायगरि लगाउने गरेको जर्सी नम्बर १० ब्राजिलियन स्टार राफिन्हाले लगाउने भएका छ्न् ।

शुक्रबार भेनेजुयलासङ्गको विश्वकप फुटबल छनोट अन्तरगतको खेलमा राफिन्हा १० नम्बर जर्सीमा देखिने भएका हुन् ।

चोटको कारण नेइमारले छनोट खेल गुमाएपछि उनले प्रयोग गर्ने गरेको जर्सी नम्बर १० राफिन्हाले प्रयोग गर्ने जनाइएको छ ।

स्पेनिस क्लब बार्सिलोनाबाट व्यवसायीक फुटबल खेलिरहेका राफिन्हा अहिले उच्च लयमा छ्न् । यो सिजन राफिन्हाले ला लिगामा ७ गोल गरिसकेका छ्न् भने च्याम्पियन्स लिगमा ५ गोल गरेका छ्न् ।

विश्व फुटबलमा १० नम्बर जर्सीको छुट्टै स्थान रहने गरेको छ । विश्वका चर्चित खेलाडीहरु पेले, म्यारोडोना, जिनेदिन जिदान, फ्रान्सिको टोटी देखि रोनाल्डिन्हो, काका, मेस्सी, नेइमारसहितका सर्वकालिन चर्चित फर्वाडहरुले राष्ट्रिय टिमबाट जर्सी नम्बर १० लगाएर खेल्ने गरेका थिए ।

ब्राजिलियन स्टार नेइमार पटक-पटक चोटिल हुँदै राष्ट्रिय टिमबाट बाहिरिने प्रक्रिया लामो हुँदै गएपछि ब्राजिलले नेइमारको स्थानमा राफिन्हालाई अगाडि सारेको छ ।

कतिपय फुटबल विश्लेषकहरुले अब ब्राजिलमा नेइमारलाई प्रतिस्थापन गर्न राफिन्हा तयार रहेको समेत भनेका छ्न् ।