ओली सरकारप्रति भारत र चीन दुवै खुसी छैन: अग्नि सापकोटा (भिडिओ)

काठमाडौं । नेकपा माओवादी केन्द्रका उपाध्यक्ष अग्निप्रसाद सापकोटाले कांग्रेस एमाले मिलेर बनेको केपी शर्मा ओली नेतृत्वको सरकारप्रति दुवै छिमेकी खुसी नभएको दाबी गरेका छन् ।

माओवादी काभ्रे-काठमाडौं सम्पर्क समितिको भेलालाई सम्बोधन गर्दै माओवादी प्रवक्तासमेत रहेका सापकोटाले अहिलेको सरकारले दुवै छिमेकी मुलुकसँग सन्तुलित सम्बन्ध राख्न नसकेको बताए ।

उनले भने, ‘दुइटा छिमेकीको बीचमा हाम्रो पार्टी नेतृत्वको सरकारले सन्तुलित सम्बन्ध कायम गरेको थियो । अहिले त्यो सन्तुलन बिग्रिएको छ । अहिलेको सरकारप्रति न उत्तर न त दक्षिण नै खुसी छ । सात समुन्द्र पारिका पनि धेरै खुसी छन् जस्तो लाग्दैन ।’

उपाध्यक्ष सापकोटाले अन्तर्राष्ट्रिय क्षेत्रमा माओवादीको इमेज धेरै माथि पुगेको जिकिर गरे ।

उनले अगाडि भने, ‘पार्टी अध्यक्षले अन्तर्राष्ट्रिय क्षेत्रमा भएका सबै संयुक्त राष्ट्रसंघको महासभालगायत फोरमहरुमा नेपालको राम्रो प्रतिनिधित्व गरिराख्नुभएको छ । अहिले अन्तर्राष्ट्रिय जगतलाई हिजो जनयुद्धकालमा नाममात्रै सुनिएको थियो, प्रचण्ड भन्ने मान्छे परिवर्तन र जनताप्रति समर्पित मान्छे हो भन्ने परेको छ अन्तर्राष्ट्रिय स्तरमा पनि ।’

उनले अहिलेको सरकार भए पनि जनताले प्रत्याभूत गर्न नपाएको बताए ।

नेता सापकोटाले भने, ‘सरकारको विचार, विवेक, पहलकदमी शून्य छ, सरकार छ भन्ने छ, मन्त्रिपरिषद् छ, तर सरकारको अस्तित्व देखिएको छैन । काभ्रेमा विपद् पर्दा सरकार देखिन, कमरेड प्रचण्ड देखिनुभयो ।’