कीर्तिपुर- ३ का वडाध्यक्षद्वारा कार्यवाहक मेयरको कार्यकक्षमा तोडफोड

काठमाडौं । कीर्तिपुर नगरपालिका-३ का वडाध्यक्ष सुविन्द्र महर्जनले कार्यवाहक मेयर शुभलक्ष्मी शाक्यको कार्यकक्षमा तोडफोड गरेका छन् । आज दिउँसो नगरपालिका पुगेका उनले प्रमुख प्रशासकीय अधिकृतले धेरैबेर कुराएको झोक कार्यवाहक मेयरसामु पोखेका हुन् ।

वडाध्यक्ष महर्जन आफ्नो वडाको बाटोको काम लिएर नगरपालिका आएका थिए । बाटो बिस्तार लागि एउटा सूचना निकाल्न नगरपालिकाले ढिलाइ गरेको उनको गुनासो थियो । उनी आउँदा प्रमुख प्रशासकीय अधिकृत माधवप्रसाद ढकाल अर्कै बैठकमा व्यस्त थिए । वडाध्यक्ष महर्जले झण्डै दुई घन्टा प्रतीक्षा गर्नुपरेको थियो ।

त्यसपछि आक्रोश थाम्न नसकेका उनी मेयर शाक्यको कार्यकक्षमा छिरेर विवाद गरे । यस क्रममा लात्तिले त्यहाँ रहेको सिसाको टेबलमा हानेका थिए । टेबल झिरिप्पै फुट्यो ।

नगरपालिकाका प्रवक्ता दिवाकर अधिकारीले वडाध्यक्षले नियतवस तोडफोड नगरेको बताए ।

उनले भने, ‘विवाद सामान्य थियो । उहाँले यस्सो लात्तीले हान्दा टेबल फुटेको हो । अहिले दुई पक्षबीच कुरा भइरहेको छ ।’

नगरपालिकाको सम्पत्ति क्षति भएकाले त्यसको क्षतिपूर्ति तिनुपर्ने र माफी माग्नुपर्ने माग गरिएको छ । यसमा वडाध्यक्ष तयार भएमा प्रहरीमा केस नजाने प्रवक्ता अधिकारीले बताए ।