५० करोडको ‘माइलस्टोन’तर्फ लम्किँदै ‘पूर्णबहादुरको सारंगी’, निर्माताको झाेलीमा कति ?

काठमाडौं । गत कात्तिक १५ गतेबाट प्रदर्शनमा आएको चलचित्र ‘पूर्णबहादुरको सारंगी’ले घरेलु बक्स अफिसमा आफ्नो रफ्तारलाई कायमै राखेको छ । ३४ करोड ३६ लाखको ऐतिहासिक ग्रस कलेक्सन गरिसकेको यो चलचित्र तत्काल रोकिने छाँट छैन । निर्माता विनोद पौडेलका अनुसार हिजो र आजको कलेक्सन जोड्ने हो भने ३७ करोड पुगिसकेको छ ।

अब भने चलचित्रको बक्स अफिस कलेक्सन सार्वजनिक नगर्ने पौडेलले बताए । उनले भने, ‘अब एकैपटक ५० करोड ग्रस गरेपछि हाल्ने हो ।’

चलचित्रको व्यापारको रफ्तारलाई हेर्ने हो भने ५० करोडको ऐतिहासिक आँकडा छुनसक्ने देखिन्छ । १० करोडभन्दा माथिको ग्रस कलेक्सनलाई उत्साहजनक मान्ने गरिएको नेपाली चलचित्रहरुबीच ‘पूर्णबहादुरको सारंगी’ ले अभूतपुर्व यात्रा तय गर्दै नयाँ मानक स्थापित गरिरहेको छ ।

अहिले निर्माण टीम उपत्यका बाहिरका हलहरुमा पुगिरहेका छन् । दमक, झुम्का, लालबन्दी, चितवन, हेटौंडा पुगिसकेको टोली दुई–तीन दिनपछि मात्रै काठमाडौं फर्कने योजनामा छ । हल भिजिटको अनुभव सुनाउँदै पौडेलले भने, ‘१८ औं, १९ औं दिनमा पनि जुन प्रकारले शो पाइरहेको छ, दर्शकहरुले हेरिरहनुभएको छ, त्यस हिसाबले ५० करोड क्लबमा छिर्न असम्भव चाहिँ छैन ।’

यति मात्रै होइन, ‘पूर्णबहादुरको सारंगी’ले विदेशमा पनि दर्शकलाई आकर्षित गरिरहेको छ । पौडेलका अनुसार ५ दिन अगाडिको रिपोर्ट अनुसार विदेशमा २० करोडमाथि ग्रस गरिसकेको थियो । अहिले पनि विदेशमा चलचित्रको रफ्तार कम नभएको पौडेलले बताए । जापान र क्यानडाबाहेक सबै देशहरुमा आफ्नै कम्पनी सेभेज सीज इन्टरटेनमेन्टले वितरण गरिरहेको उनले जानकारी दियो ।

‘पूर्णबहादुरको सारंगी’ले यो रफ्तारमा बक्स अफिस कलेक्सन गर्छ भनेर आफूहरुले नसोचेको पौडेलले बताए । एक करोड ३० लाख बजेटमा बनेको यस चलचित्रको प्रमोसनमा १०/१५ लाख बजेट थपिएको पौडेलको दाबी छ ।

उनले भने, ‘सुरुमा जुन प्रकारले शो पाएन, त्यसबेला त मार्केटिङकै मात्रै पैसा उठाइदिए हुन्थ्यो भन्ने लागेको थियो । दुई तीन दिनपछि ७ करोड चाहिँ हान्छ भन्ने लागेको थियो । तर, दर्शकले यति धेरै माया गरिदिनुभयोे, जुन हाम्रो कल्पनामा नै थिएन ।’

पौडेल थप्छन्, ‘नेपालमा पनि चलचित्रको यति ठूलो मार्केट रहेछ भनेर छाती फुलाउन सकिने रहेछ । बुझेर लगानी गर्ने हो भने चलचित्रमा पैसा डुब्दैन ।’

चोरीको आरोप लगाएर अनेक लफडामा पार्न खोजिए पनि चलचित्र राम्रो बनेका कारण व्यापारमा असर नगरेको पोडेलले बताए ।
गत शुक्रबारबाट प्रदर्शनमा आएको ‘हृश्व दीर्घ’ ले पनि ‘पूर्णबहादुरको सारंगी’ लाई ठूलो असर गरेको देखिँदैन । आउँदो हप्ता पनि त्यस्तो प्रतिक्षित चलचित्रहरु नभएका कारण यो चलचित्रको व्यापारिक आँकडा निरन्तर माथि जाने अवस्था छ ।

धेरैलाई चासो हुन सक्छ, पूर्णबहादुरको सारंगीले यसरी उधुम मच्चाइरहँदा निर्माताको खल्तिमा कति रकम पर्यो होला त ?
देशभित्रका हलहरुबाट भएको कलेक्सनको कुरा गरौं । अहिलेसम्मको ग्रस कलेक्सन ३७ करोड हो, जुन हल सञ्चालक र निर्माताले ५०/५० प्रतिशत बाँड्छन् ।

यसो हुँदा निर्माताको भागमा साढे १८ करोड पर्छ । त्यसबाट १३ प्रतिशत भ्याट, ५ प्रतिशत स्थानीय कर (काठमाडौं उपत्यकामा मनोरन्जन कर), ५ देखि १० प्रतिशत वितरकलाई कमिसन काटिन्छ । यसरी हेर्दा ३७ करोड ग्रस कलेक्सनबाट पूर्णबहादुरको निर्माताको हातमा १४/१५ करोड नेट रकम हात परिसकेको छ ।

विदेशको बक्स अफिससमेत २० करोडबाट उकालो लागिसकेको छ । यो पनि ऐतिहासिक हो । अहिलेसम्म कुनै पनि चलचित्रले विदेशबाट यति कलेक्सन गरेका थिएनन् । चलचित्रको डिजिटल राइटस् बिक्री गर्न बाँकी छ ।

स्वदेश र विदेशको लाइफटाइम बक्स अफिस कलेक्सन र डिजिटल राइटस् जोड्दा निर्माताको झोलीमा भित्रिने रकमको एकिन हिसाब अहिल्यै निकाल्न सकिन्न । चलचित्र करिब पौडेलले भन्छन्, ‘विदेशमा र नेपालमा झण्डै उस्तै मार्केट रहेछ भन्ने कुरा हाम्रो चलचित्रले प्रमाणित गर्यो ।’