पोर्चुगलसँग बराबरी खेलेपछि क्रोएसिया अन्तिम आठमा प्रवेश

हेटौँडा । पोर्चुगलसँग बराबरी खेलेपछि क्रोएसिया यूएफा नेसन्स लिगको क्वाटर फाइनलमा प्रवेश गरेको छ ।

सोमबार राति सम्पन्न खेलमा पोर्चुगलसँग बराबरी खेल्दै क्रोएसियाले क्वाटर फाइनलमा स्थान पक्का गरेको हो ।

पोर्चुगल यसअघि नै प्रतियोगिताको अन्तिम ८ मा प्रवेश गरिसकेको थियो ।

रोनाल्डोसहितका केही स्टार खेलाडीलाई विश्राम दिएको खेलमा पोर्चुगलले क्रोएसियालाई बराबरीमा रोकेको हो ।

पोर्चुगलको लागि ३३औँ जोआओ फेलिक्सले गोल गर्दै टोलीलाई अग्रता दिलाएका थिए । तर ६५औँ मिनेटमा डिफेन्डर जोस्को ग्भार्डियोलले गोल गरेपछि खेल बराबरी भयो र अन्तिम रिजल्ट पनि बराबरी नै रह्यो ।

बराबरीसँगै लिग ए समूह एकमा ६ खेलमा १४ अंक जोडेको पोर्चुगल शीर्ष स्थानमा कायमै रह्यो । समान खेलमा ८ अंक जोडेको क्रोएसिया क्वाटर फाइनलमा प्रवेश गर्‍यो ।