सिटिजन्स बैंकको ‘स्मार्ट हब’- मेसिनबाटै पैसा जम्मा, २४ घण्टै बैंकिङ सेवा

काठमाडौं । कोरोना महामारीपछि नेपालमा डिजिटल कारोबारले फड्को मारिरहेको छ । नगदमा कारोबार गर्नेहरू विस्तारै घट्दै गएका छन् । डिजिटल कारोबार गर्ने नेपालीहरूको संख्या दिनप्रतिदिन बढ्दो छ ।

अबको युग डिजिटल युग भनेर नै सिटिजन्स बैंकले त्यसमै केन्द्रित भएर काम गरिरहेको छ । डिजिटल कारोबारलाई विशेष प्राथमिकता दिनुपर्छ र आफ्ना ग्राहकहरूलाई डिजिटलरूपमा अभ्यस्त बनाउनु पर्छ भन्ने हाम्रो लक्ष्य छ ।

सिटिजन्स बैंकले पछिल्लो समय डिजिटल कारोबारलाई प्रोत्साहन गरिरहेको छ । कागजरहित सेवामा केन्द्रित भएर सिटिजन्स बैंक अगाडी बढिरहेको छ । वित्तीय कारोबारलाई डिजिटलाइजेसन गर्न बैंकले विभिन्न योजना तथा कार्यक्रमहरू सञ्चालन गरिरहेको छ । गएको असोज महिनालाई बैंकले ‘डिजिटल मन्थ’ घोषणा गरेर मनायो ।

सोही अवसरमा बैंकको केन्द्रीय कार्यालयमा ‘स्मार्ट हब’ सेवा समेत सञ्चालन गरिएको छ । डिजिटलरूपमा बैंकिङ सम्बन्धी सम्पूर्ण सेवा एकै ठाउँबाट ग्राहकलाई दिन यो हब सञ्चालन गरिएको हो । डिजिटल कारोबार गर्न ग्राहकलाई सिकाउन पनि यो हब सञ्चालनमा ल्याइएको हो । ‘स्मार्ट हब’ बाट बैंकका कर्मचारीहरूको उपस्थिति बिना मेसिन मार्फत ग्राहकले सेवा लिन सक्छन् ।

‘स्मार्ट हब’ बाट ग्राहकहरूले नगद निकाल्नेदेखि चेक जम्मा गर्ने, बैंक खाताको विवरण हेर्ने, स्टेटमेन्ट प्रिन्ट गर्नेदेखि नगद जम्मा गर्नेसम्मको सेवा लिन सक्नेछन् । बैंकका ग्राहकहरूले यहाँ भएका मेसिन मार्फत सबै कारोबार गर्न सक्छन् । बैंकको केन्द्रीय कार्यालयमा रहेको ‘स्मार्ट हब’ मा दुईवटा एटीएम मेसिन रहेको छ । यो मेसिनबाट पैसा निकाल्नका लागि एटीएम कार्ड नभए पनि हुन्छ । ग्राहकले कार्डरहित सेवा समेत लिन सक्नेछन् । त्यसबाहेक मोबाइल बैंकिङबाट रिक्वेस्ट पठाएर पनि नगद निकाल्न सकिन्छ ।

यस हबमा अर्को क्यास डिपोजिट मेसिन पनि राखिएको छ । यस मेसिनले नगद लिने काम गर्छ । मेसिनमार्फत पाँच सय र हजार रूपैयाँ दरका पैसा जम्मा गर्न सकिन्छ ।

कसैले पाँच सय र हजार रूपैयाँका नोटहरू बैंकमा लिएर आएका छन् भने उनीहरू काउन्टरमा जानु पर्दैन । यो मेसिनमा गएर आफ्नो मोबाइल नम्बर हाल्नु पर्छ, एउटा ओटीपी आउँछ । ओटीपी हालिसकेपछि आफ्नो अकाउन्ट नम्बर हाल्नुपर्छ । त्यसपछि मेसिनले त्यहाँ पैसा राखिदिनु भन्छ । उक्त पैसा मेसिनले गणना गरेर जम्मा गरिदिन्छ । र, जम्मा गरेको नगदबारे जानकारी समेत उक्त मेसिनले नै दिन्छ ।

अहिले यस मेसिनमार्फत पाँच सय र हजाररूपैयाँ दरका नोटमात्रै जम्मा गर्न मिल्छ । अब विस्तारै ५, १०, ५०, १०० दरका नोटको पनि सोही मेसिनमार्फत जम्मा गर्न मिल्ने बैंकले तयारी गरिरहेको छ ।

‘स्मार्ट हब’ बाट चेकको समेत कारोबार हुन्छ । चेक डिपोजिट गर्नका लागि स्मार्ट हबमा एउटा मेसिन राखिएको छ । बैंकहरूको चेक डिपोजिट गर्नु परेमा समेत त्यसका लागि यस हबबाट नै सेवा लिन सकिन्छ ।

चेक डिपोजिट मेसिन केन्द्रीय कार्यालयबाहेक कलंकी, नयाँ बजार, वीरगञ्ज, विराटनगर र बुटवलमा समेत राखिएको छ ।

‘स्मार्ट हब’ सञ्चालन गरेपछि ग्राहकहरूले समेत राम्रो प्रतिक्रिया दिइरहेका छन् । अब नयाँ अकाउन्ट खोल्न मिल्ने, मोबाइल बैंकिङको पीन बिर्सिएमा त्यहीँबाट नयाँ पिन लिन सकिने, कारोबारसम्बन्धी समस्या केही आएमा स्मार्ट हबबाट नै सेवा लिन सकिने व्यवस्था बैंकले थप गर्न लागेको छ ।

‘स्मार्ट हब’ सञ्चालनमा आएदेखि ग्राहकले मात्रै होइन बैंकका कर्मचारीहरूलाई समेत सहज भइरहेको छ । सिटिजन्स बैंकले भरसक मोबाइलबाट नै सम्पूर्ण कारोबार गरुन् भन्ने हो । यदि आउनु नै परेमा ग्राहकले छिटो छरितोरूपमा स्मार्ट हबमार्फत सेवा लिन सक्नेछन् ।

‘स्मार्ट हब’ बाट जुनसुकै समयमा ग्राहकले सेवा लिन सक्नेछन् । बैंकिङ कारोबार गर्न १० देखि ५ सम्मको मात्रै समय हो भन्ने धेरैलाई लागिरहेको हुन्छ । तर, ‘स्मार्ट हब’ ले कार्यालय समयबाहेक पनि बैंकिङ सेवा दिन्छ । २४ सै घण्टा स्मार्ट हबमार्फत बैंकिङ सेवा लिन सकिन्छ ।

मेसिनले गर्ने काम र मानिसले गर्ने काममा फरक हुन्छ । स्मार्ट हबमा सम्पूर्ण काम मेसिनले गर्ने भएकाले छिटो पनि हुने भयो । काउन्टरमा गएर लाइन बस्नु पनि परेन । ‘स्मार्ट हब’मा धेरै फाइदा रहेकाले यसमार्फत ग्राहकहरूले सेवा लिन सकिन्छ ।

(सिटिजन्स बैंकका डिपोजिट मार्केटिङ विभागका प्रमुख थापासँग नेपाल प्रेसकर्मी रिता राउतले गरेको कुराकानीमा आधारित)